Jeńis Qasymbek: Sý sektoryna qajetti maman tapshy
ASTANA. QazAqparat - Memlekettik bilim berý tapsyrysyn bekitý kezinde sý sektorynyń qajettilikterin eskerý qajet. Bul týraly búgin QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat.
«Maman máselesi de mańyzdy aspektilerdiń biri. Kommýnaldyq sharýashylyq salasynda resýrsty jáne energııany únemdeıtin zamanaýı tehnologııalardy qoldanyp, jumys isteı alatyn bilikti mamandar jetispeıdi. Mysaly, 2016-2017 oqý jylynda «Sýmen jabdyqtaý jáne sý tartý júıelerin tazartý» mamandyǵy boıynsha 75 grant bólinse, «Sýmen jabdyqtaý jáne sý tartý» mamandyǵy boıynsha grant bólinbegen. Biz jańartý men jańa ınfraqurylym salýdy ınvestıtsııalaýdan bólek, sý arnasy mamandarynyń biliktiligin arttyrý baǵdarlamalaryn júzege asyrý qajet dep esepteımiz», - dedi Jeńis Qasymbek.
Sonymen qatar onyń aıtýynsha, tehnıkalyq jáne basqarýshylyq salalarda sheteldik tájirıbeni paıdalanýdy kúsheıtý jáne otandyq ýnıversıtetterge tıisti tehnıkalyq mamandyqtardy engizý kerek.
«Jergilikti atqarýshy organdar mamandardy daıarlaýǵa qatysty memlekettik bilim berý tapsyrysyn bekitý kezinde 72 myńnan astam adam jumys isteıtin sý sektorynyń qajettilikterin eskerýleri tıis», - dedi mınıstr.
Aıta keteıik, QR Parlamenti Májilisinde elimizdiń eldi mekenderin sapaly aýyz sýmen qamtamasyz etýdiń ózekti máselelerine arnalǵan parlamenttik tyńdaý ótýde. Sharaǵa Májilis Tóraǵasy Nurlan Nyǵmatýlın, QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov, Qarjy mınıstri Baqyt Sultanov, múddeli memlekettik organdardyń, ǵylymı-zertteý ınstıtýttarynyń ókilderi qatysýda.
