Jeńis Qasymbek Shymkent aglomeratsııasyn damytý jolyndaǵy naqty qadamdardy usyndy
ASTANA. QazAqparat - QR Investıtsııalar jáne damý mınıstri Jeńis Qasymbek Úkimet otyrysynda Shymkent aglomeratsııasyn damytý jobasyn qoldaýdy surady, dep habarlaıdy «QazAqparat» HAA tilshisi.
«Memleket basshysy «Qazaqstan - 2050» strategııasynda Astana, Almaty jáne Shymkent, Aqtóbe qalalarynda aglomeratsııalardy damytý boıynsha strategııalyq qajettilikterdi belgiledi. Osyǵan baılanysty óńir aýmaǵynyń ósimin basqarý úshin Shymkent aglomeratsııasynyń aýmaqtaryn damytýdyń óńiraralyq shemasy ázirlendi. Aglomeratsııanyń yqpal etý aımaǵynda Shymkent - ortalyq qalasy, Arys qalalyq ákimshilik pen oblystyq jeti aýdannyń bólikteri kiredi. Olar: Báıdibek, Qazyǵurt, Ordabasy, Saıram, Saryaǵash, Tóle bı jáne Túlkibas. Halyq sanynyń 2030 jylǵa qaraı 2,3 mıllıonǵa ulǵaıatynyn eskere otyryp, aglomeratsııanyń kóshi-qon aǵymdaryn retteý qajet», - dedi mınıstr.
Jeńis Qasymbektiń aıtýynsha, negizgi josparlaý osteri boıynsha Saryaǵash, Arys jáne Turar Rysqulov sekildi iri eldimekenderiniń bazasynda kontrmagnıt qalalardy qalyptastyrý usynylady.
«Óndirgish kúshterdi damytýdyń usynylǵan sharalary óńirdiń ekonomıkalyq negizin transformatsııalaýǵa, qyzmet kórsetý salamyn aglomeratsııanyń kóliktik-logıstıkalyq jáne týrıstik áleýetin damytýǵa baǵyttalǵan. 2030 jylǵa qaraı farmatsevtıka, munaı, hımııa, metallýrgııa, qurylys ındýstrııasynyń, ǵylym, saýda jáne qyzmet kórsetý salalary damıtyn bolady. Óńdeý ónerkásibi 5 esege ulǵaıady. Aýyl sharýashylyǵynyń kooperatsııalary men agroónerkásiptik keshenin damýy mal sharýashylyǵynyń jalpy ónim kólemi tórt esege, jáne ósimdik sharýashylyǵynyń jalpy ónim kólemin bes esege arttyrýǵa yqpal etedi», - deıdi ol.
Mınıstr osydan keıin naqty usynystarǵa kóshti. Atap aıtqanda, kóliktik júıeni damytý úshin Shymkent qalasynyń Ońtústik, Shyǵys jáne Soltústik bólikterinde úsh aınalma joldy, qalanyń syrtqy aınalmadaǵy 118 shaqyrymyn jóndeýdi, Saryaǵash qalasynyń aınalma joly men oblystyq jáne aýdandyq mańyzdaǵy 720 shaqyrym joldy jóndeýdi usyndy. Usynystardyń arasynda «Shymkent-2» temir joly men Shymkentti aınalma 43 shaqyrymdyq temir joldy salý jumysy da bar. Sonymen qatar, Arys vokzalyn da jóndeýdiń mańǵyzdylyǵy týyp otyr.
Mınıstr sondaı-aq, Shymkent qalasy men Saryaǵash aýdanynda 2020 jylǵa deıin eki kóliktik-logıstıkalyq ortalyq salý mańyzdy ekenin aıtady. Jeńis Qasymbek ózge de áleýmettik, ınnovatsııalyq, ekologııalyq baǵyttardaǵy birshama usynystardy aıta kele Úkimet basshysynan jobany qoldaýdy surady.
«Bul is-sharalar qyzmet kórsetý salasyn jaqsartyp, qalanyń kóliktik-eksporttyq áleýetin arttyra túser edi. Jospar barlyq memlekettik organdarmen, Ońtústik Qazaqstan oblysynyń ákimdigimen kelisil. Jobany qoldaýyńyzdy suraımyn», - dep túıdi mınıstr.
