Jeńis Qasymbek shetelde promoýterlik bólimshelerdi kóptep ashýdy usyndy
ASTANA. QazAqparat - QR Investıtsııalar jáne damý mınıstri Jeńis Qasymbek otandyq taýarlardy shetelge eksporttaýdyń negizgi problemalaryn atady, dep xabarlaıdy QazAqparat tilshisi.
Mınıstrdiń sózine qaraǵanda, búginde memlekettik organdar da, bıznesmender de saýda-ekonomıkalyq kelisimderdiń negizgi erejelerin durys paıdalanbaı júr. Sol sebepti basymdy baǵyttar boıynsha rásimdelgen qujattardy jan-jaqty túsindirip, barlyq problemalardy úkimetaralyq komıssııanyń qaraýyna der kezinde shyǵarý qajet. «Ekinshi másele, shet elderde bizdiń eksporttyq-promoýterlik qoldaý júıesi durys damymaǵan. Sonyń saldarynan jańa naryqtarǵa kire almaı otyrmyz. Búginde damyǵan memleketterdiń kóbisi saýda ókildilikter jelisin ashyp alǵan. Mysaly, Ońtústik Koreıa, Aýstralııa, Reseı jáne taǵy basqa elder osy baǵytta jaqsy jumys istep keledi. Sol sebepti eksporttyq strategııamyzdyń aıasynda shet elderde ókildikter ashý sharalaryn jalǵastyrý qajet. Birinshiden, eksporttyq qyzyǵýshylyǵy basym elder, ol - Reseı, Qytaı, Úndistan, Iran, Qyrǵyzstan, Túrkııa, Ózbekstan, Belarýs, Ýkraına, osy elderde. Sonymen birge shet elderde jańa eksporttyq ınfraqurylymdy qoldaý quraldaryn qolǵa alý qajet», - dedi J.Qasymbek Úkimettiń búgingi otyrysynda.
Onyń aıtýynsha, eksport saıasatyn qalyptastyrý men biryńǵaı úılestirýdi iske asyrý úshin ınstıtýtsıonaldy tásilderdi de kúsheıtý kerek. Sondaı-aq, álemdik naryqqa ulttyq brendterdi tezdetip shyǵarǵan jón.
