Jeńis Qasymbek: salǵyrttyq tanytqan qurylysshylar isi qylmystyq turǵyda qaralady

ASTANA. QazAqparat – Astana qalasynyń ákimi Jeńis Qasymbek óz isine salǵyrt qaraǵan qurylys salýshylardyń isi sotqa jiberiletinin málim etti, dep habarlaıdy QazAqparat ákimniń áleýmettik jelidegi paraqshasyna silteme jasap.

«Birqatar turǵyn úı kesheniniń turǵyndarymen jergilikti oryndarda tikeleı kezdestim. Olardyń úıleri jeke qurylys salýshylardyń saldarynan keshiktirilip jatyr. Máselen, olar – «Qazanat-2», «Sofııa», «Oazıs», «Arai apartaments» turǵyn úı keshenderi. Keste boıynsha kórsetilgen ýaqyttan keshiktirilgeninen bólek qujat, qarjylandyrý jáne t.b. boıynsha problemalar bar. Anyqtalǵan zańbuzýshylyqtar boıynsha qurylys salýshylar ákimshilik jaýapkershilikke tartyldy. Kezdesýge Parlament Májilisiniń depýtaty Dáýlet Muqaev qatysty. Qurylys salýshylardy ózgelerdiń taǵdyryna beı-jaı qaramaýǵa shaqyramyn! Eger zańdy talaptar oryndalmasa ári zańbuzýshylyqtar ýaqytynda jóndelmese, is sotqa jiberiledi. Materıaldar qylmystyq turǵyda qaralady. Al nysandar ózge ınvestorlarǵa tapsyrylady», - dep jazdy Jeńis Qasymbek.

Aıtýynsha, osyǵan uqsas problemalar «Sapsan», «Diana», «R-club», «R-club Deluxe», «Ásker 1 jáne 2», «Aqtaý sıtı» turǵyn úı keshenderinde de bar. Ákim quqyq qorǵaý organdarymen birlese problemaly úılerdiń qurylysyn nazarda ustaıtynyn málim etti.