Jeńis Qasymbek: Ózbekstan naryǵyna eń birinshi lokomotıvterdi ótkizgimiz keledi
ASTANA. QazAqparat - QR Investıtsııalar jáne damý mınıstri Jeńis Qasymbek Qazaqstan men Ózbekstan arasynda ınvestıtsııalyq turǵyda qandaı alys-beris bolatynyn aıtyp berdi, dep habarlaıdy «QazAqparat» HAA tilshisi.
«Investıtsııa boıynsha aıtarym. Biz ótken jyly sońǵy bıznes-forýmda jalpy somasy 840 mıllıon AQSh dollaryna jýyq ár túrli kelisimderge qol qoıǵan bolatynbyz. Bıyl alǵashqy jartyjyldyqta Astanada da dál osyndaı iri bıznes-forým ótkizýge kelistik. Biz qazirdiń ózinde Ózbekstan eline buryn eksporttamaǵan ónimderdi shyǵara bastadyq», - dedi Jeńis Qasymbek Astanada ótken Qazaqstan Respýblıkasy men Ózbekstan Respýblıkasy arasyndaǵy ekijaqty yntymaqtastyq jónindegi úkimetaralyq komıssııasynyń 17-otyrysynda tilshilerge bergen suhbatynda.
Mınıstrdiń aıtýynsha, búgingi tańda elimizde shyǵarylyp jatqan akkýmýlıatorlar men transformatorlar, Aqtóbedegi zaýyttan relster de Ózbekstanǵa tasymaldanyp jatyr.
«Temir jol kólikterin quraý salasyndaǵy ónimderdi eksporttaý kózdelip otyr. Al ol jaqtan bizge jemis-jıdek ónimderi jetkiziledi. Demek, biz bir-birimizdiń ekonomıkamyzdy tolyqtyryp otyrmyz. Jyl boıynda lokomotıv, rels boıynsha ózbek tarapymen kelisip alýdy maqsat tutyp otyrmyz. Kelesi jyldyń basynda qorytyndy jasaımyz. Búgingi tańda Qazaqstanda lokomotıvterdiń dızeli, elektrovozdar, jolaýshylar vagony, júk vagondary óndirilýde. Eń bastysy, búgin biz Ózbekstan naryǵyna lokomotıvterdi ótkizýdi josparlap otyrmyz», - dedi mınıstr.
Eske sala ketsek, búgin Astanada ótken Qazaqstan Respýblıkasy men Ózbekstan Respýblıkasy arasyndaǵy ekijaqty yntymaqtastyq jónindegi úkimetaralyq komıssııasynyń 17-otyrysynda Qazaqstan men Ózbekstan tarapy birqatar ekijaqty kelisimderge qol qoıǵan bolatyn.
