Jeńis Qasymbek otandyq taýarlardy kóbirek paıdalanýdy talap etti
QARAǴANDY. QazAqparat - Karantın kezinde basymdyqtardyń biri - otandyq óndiristi qoldaý bolýy tıis, dep habarlaıdy QazAqparat oblys ákimdiginiń resmı saıtyna silteme jasap.
Qaraǵandy oblysynyń ákimi Jeńis Qasymbek memlekettik baǵdarlamalar boıynsha júzege asyrylatyn jobalarda qazaqstandyq jáne jergilikti taýarlardy paıdalanýdy jeke baqylaýǵa alady.
Jergilikti qamtýdy damytý máseleleri onlaın rejıminde ótken apparattyq keńeste talqylandy.
Óńdeýshi ónerkásip kásiporyndary jańa ónim shyǵarýdy ıgergeni atap ótildi.
Mysaly, qurylys ındýstrııasy salasynda oblysta 150 óndirýshi jumys isteıdi. Jergilikti taýarlardyń assortımenti úlken: tsement, temir betondy buıymdar, metalloplastık, radıatorlar, armatýra, qurǵaq qurylys qospalary jáne t. b. Bul salada Indýstrııalandyrý kartasy boıynsha jalpy somasy 25 mlrd teńgege 13 joba iske qosyldy.
«Qarapaıym zattar ekonomıkasy» baǵdarlamasy boıynsha qurylys ındýstrııasynyń 7 jobasy maquldandy.
Mashına jasaý, hımııa ónerkásibi, jeńil ónerkásip sııaqty salalarda da damý júrip jatyr.
Oblysta 215 tamaq ónerkásibiniń qaıta óńdeý kásiporyndary tirkelgen. AÓK salasynda 31 ınvestıtsııalyq joba iske asyrylýda, onyń 12-i aýyl sharýashylyǵy ónimderin qaıta óńdeý boıynsha. 2020 jyly qaıta óńdeý boıynsha 8 jobany engizý josparlanǵan.
Memlekettik satyp alý basqarmasy alty sala boıynsha «Qarapaıym zattar ekonomıkasy» jobasyndaǵy jergilikti qamtý úlesin taldaýdy usyndy. Eń joǵary kórsetkish - 87,2% - qurylys materıaldary boıynsha baıqalady. Tamaq ónerkásibinde ol 67,2%, jeńil ónerkásipte - 46,4% quraıdy.
Jeńis Qasymbek jumyspen qamtý jol kartasy nysandarynda otandyq taýarlardy paıdalanýdy erekshe baqylaýǵa alýdy tapsyrdy.
- Merdigerlerdiń Qazaqstanda jáne bizdiń oblysta óndiriletin ónimdi barynsha satyp alýyn jeke baqylaımyn. Qalalar men aýdandardyń ákimderi jergilikti qamtýdy baqylaýdy kúsheıtýi tıis. Bul jumys oryndary men salyqtar! Óz turǵyndarymyzdy jumyspen qamtý kerek, - dep atap ótti oblys ákimi.
