Jeńis Qasymbek Qytaımen birlesken keıbir jobalardyń ózgergenin málim etti

ASTANA. QazAqparat - QR Investıtsııalar jáne damý mınıstri Jeńis Qasymbek ındýstrııa baǵytynda jasalǵan qazaqstandyq-qytaılyq kelisimge sáıkes júrgizilip jatqan jumystar týraly aıtyp berdi, dep habarlaıdy «QazAqparat» HAA tilshisi.

Mınıstr bul týraly Astanada «Qazaqstan Respýblıkasy ındýstrııalyq-ınnovatsııalyq damytýdyń 2015-2019 jyldarǵa arnalǵan memleketik baǵdalamasynyń iske asyrylýy týraly» partııalyq tyńdaýlary barysynda málim etti.

«Qazaqstandyq-qytaılyq birlesip jasap jatqan ındýstrııaldyq baǵdarlamanyń ishine 51 joba kiredi. Onyń jalpy somasy 27-28 mlrd AQSh dollaryn quraıdy. Ol tizimniń jyl saıyn ózgeretin túri bar. Bir jaǵynan naryqtyń jaǵdaıy. Ol 52 jobanyń beseýi 2015-2016 jyldary iske qosyldy. Búgingi kúni jumys istep tur. Onyń biri «Saryarqa avtoónerkásip» kompanııasy, ekinshisi «Taıynsha Maı» JShS. Taǵy sol sekildi basqa da jobalar bar. Bir apta buryn osy másele boıynsha Qytaı úkimetimen kezdeskenbiz. Jeti jobany bul tizimnen alyp tastap, onyń ornyna 7 jańa jobany qostyq. Nege deseńiz, naryqtyń jaǵdaıyna baılanysty jobalardyń ishinde metall boıynsha jumystardy kózdegenbiz. Alaıda, ınvestorlar bul jobalarǵa kelmeı qaldy. Onyń ornyna úlken jobalar keldi. Máselen, «KOSKA» álemdegi iri teńizde jumys atqaratyn konteınerlik kompanııa. Ol «Qorǵas-Shyǵys qaqpasy» arnaıy ekonomıkalyq aımaǵyna kelip, 49 paıyzdy alyp jatyr. Ol másele biz úshin óte qýanyshty. Óıtkeni, teńizde isteıtin kompanııa ol óziniń taýar aınalymyn Qorǵas arqyly Reseıge burady. Tizim jyl saıyn ózgeretin bolady. Biraq, qazirge aıtarym - bes joba qosyldy, 13 joba boıynsha jumystar júrgizilip jatyr», - deıdi Jeńis Qasymbek.