Jeńis Qasymbek: Qurylys salýshylardy sapasyz jumysy úshin qatań jazalaıtyn bolamyz
QARAǴANDY. QazAqparat - Qaraǵandy oblysy turǵyn úı qurylysyn ulǵaıtatyn bolady. Bul rette sapany baqylaýǵa erekshe kóńil bólinedi. Nashar jumys isteıtin qurylys salýshylar jazasyz qalmaıdy.
Bul týraly Saryarqa arnasynyń tikeleı efırinde telekórermenderdiń suraqtaryna jaýap bergen aımaq basshysy Jeńis Qasymbek málim etti, dep habarlaıdy QazAqparat tilshisi.
«Bıyl oblys boıynsha 525 myń sharshy metr turǵyn úıdi iske qosamyz - bul ótken jylmen salystyrǵanda tórtten bir ese kóp. Barlyq kólemniń shamamen 25%-y áleýmettik turǵyn úıge tıesili. Bıyl kezekte turǵandarǵa 2 500 páter berildi, ótken jyly 1 600 páter boldy, ıaǵnı 45%-dan astam ósim boldy. Biraq bul kórsetkish kezektiń tezirek alǵa jyljýy úshin jetkiliksiz», - dedi óńir basshysy.
Úsh jyl ishinde turǵyn úı qurylysyn eki esege arttyryp, mıllıon sharshy metrge deıin jetkizý josparlanyp otyr.
Jeńis Qasymbek turǵyndardyń sapaǵa qatysty shaǵymdaryn ádil dep sanaıdy.
«Men kún saıyn áleýmettik jelilerdi qadaǵalaımyn. Jeke ózime kóptegen ótinishter kelp túsedi. Úleskerlerdiń bastamashyl tobymen birneshe ret kezdestim. Qurylys salýshylarǵa qatysty suraqtar, shaǵymdar bar. Bul nysandar qabyldanbaıdy. Talaptarǵa saı kelmeıtin turǵyn úı salatyn kompanııalardy qatań jazalaıtyn bolamyz», - dep atap ótti oblys ákimi.
Óńir basshysynyń aıtýynsha, búginde bir nárseni jasyrý múmkin emes. Kez kelgen sapasyz jumys dereý jelige jarııalanady. Ákimder de áreket etedi. Suraqtardyń eshqaısysy nazardan tys qalmaıdy.
Merdigerler kepildik merzimi aıasynda barlyq kemshilikter men eskertýlerdi joıýy kerek. Olaı bolmaǵan jaǵdaıda, olar memlekettik satyp alýǵa josyqsyz qatysýshylar dep tanylyp, aıyppul sanktsııalary men isti sotta qaraý qaýpi tónedi.
