Jeńis Qasymbek: Kóppáterli úılerdi jóndeýge qosymsha 30 mlrd teńge bólinedi
«Úkimetke halyqtyń sapaly aýyz sýǵa 100 paıyz qoljetimdiligin qamtamasyz etý maqsaty júkteldi. Bıylǵy jyldyń qorytyndysy boıynsha 97 paıyz qala turǵyndary, 87 paıyz aýyl turǵyndary ortalyqtandyrylǵan sýmen qamtamasyz etiletin bolady. »Nurly jer« baǵdarlamasyna aýyz sýmen qamtamasyz etý sharalarynda, »Aýyl - el besigi« jobasynda anyqtalǵan óńirlik saıasattyń basymdyqtary eskeriledi», - dedi ol búgin Memleket basshysynyń Qazaqstan halqyna Joldaýyn talqylaýǵa arnalǵan Úkimet otyrysynda.
Vıtse-premerdiń aıtýynsha, ortalyqtandyrylǵan sýmen halyq sany kóp jáne áleýeti bar aýyldar basym tártippen qamtamasyz etiledi. Al 200 adam turatyn eldi mekenderde sýmen jabdyqtaýdyń lokaldi júıeleri qoldanylady. «Respýblıkalyq bıýdjetten 2020-2022 jyldary osy maqsattarǵa 250 mlrd teńge qarastyrylady», - dedi Jeńis Qasymbek.
Sonymen qatar ol kóppáterli turǵyn úılerdi jóndeý máselesine de toqtaldy.
«Respýblıka boıynsha qazirgi tańda 18 myń kóppáterli turǵyn úı kúrdeli jóndeýdi talap etedi. 2011 jyldan bastap 2015 jylǵa deıin osy maqsatqa 33,6 mlrd teńge bólingen. 2338 úı jóndeýden ótti. Jóndeý jumystary qaıtarymdy qarajat esebinen jalǵastyrylady. Budan buryn bólingen qarajattan jyl saıyn 1 mlrd 800 mln teńge qaıtarylatyn bolady. 2012 jyldan bastap 2019 jylǵy 2 toqsandaǵy kezeńde qaıtarylǵan qarajat esebinen barlyǵy 500 kóppáterli úı qosymsha jóndeldi. Memleket basshysynyń tapsyrmasyna sáıkes osy baǵdarlamaǵa 2 jyldyń ishinde qosymsha 30 mlrd teńge bólý kerek»,- dedi vıtse-premer.
