Jeńis Qasymbek: Kóliktik ınspektsııany túbegeıli ózgertemiz

ASTANA. QazAqparat - QR Indýstrııa jáne ınfraqurylymdyq damý mınıstrliginde ortalyq apparat pen aýmaqtyq qurylymdardyń qyzmetkerleri jemqorlyqqa qarsy kúres sharalarymen tanysty. QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń ókilderi osy salada paramen ustalǵandardy kórsetip, qylmystyq jazaǵa tartý jaıynda aıtyp berdi, dep xabarlaıdy QazAqparat tilshisi.

«Erteń bizde keńeıtilgen alqa májilisi ótedi. Oǵan aýmaqtyq qurylymdardyń basshylary da keldi. Osy múmkindikti paıdalanyp, alqa májilisine deıin jemqorlyq máselesin qarastyryp shyqqandy jón kórdik. Jemqorlardy ustaý týraly vıdeony da kórsetemiz. Men ózim on kúndeı buryn barlyq vıdeolardy kórip shyqtym. Shynymdy aıtsam, sol kezde qatty uıaldym», - dedi mınıstr J.Qasymbek.

Onyń aıtýynsha, jemqorlyq áreketteriniń teń jartysy kóliktik ınspektsııaǵa tıesili. Osyǵan baılanysty J.Qasymbek atalǵan qurylymǵa eskertý jasady.

«Ashyǵyn aıtý kerek, jaǵdaı ózgerip jatqan joq. Sizderdi taǵaıyndaıdy, qaıta aýystyrady. Biraq ózderińiz «júıege» qarsy tura almaısyz. Ol sizderdi «jep qoıyp» otyrady. Sóıtip, eki-úsh buryn bolǵan qyzmetkerler sııaqty jumys isteı bastaısyzdar. Olaı bolmaıdy. Biz birqatar sharalardy qolǵa alatyn bolamyz. Men osyny aldyn ala aıtyp qoıaıyn. Osy jyldyń ishinde kóliktik ınspektsııada qaıta qurylymdaý bolady. Oǵan qatysty fýnktsııalardyń kóbisi avtomattandyrylǵan júıege aýystyralady. Osylaısha, jolda turatyn mamandardy barynsha azaıtamyz. Adamdar jolda turmaıdy. Al qalǵan fýnktsııalardy basqa memlekettik organdarǵa beremiz. Sóıtip, kóliktik ınspektsııany túbegeıli ózgertemiz. Sondyqtan jyldyń basynda eskertip qoıaıyn dep otyrmyn. Kóliktik ınspektsııany tolyǵymen attestatsııadan ótkizemiz. Biz jergilikti jerde ınspektorlardyń sanyn 30-40 protsentke qysqartýdy josparlap otyrmyz. Sol sebepti jumysty ózgertińiz. Áıtpese, sizdermen qoshtasamyz. Basqa qurylymdarǵa da aıtarym osy», - dep atap kórsetti J.Qasymbek.

Al QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov arnaıy jumys tobynyń qurylǵanyn jetkizdi.

«Menińshe, josparǵa biz naqty sharalardy engizip, mınıstrlikke qarasty qurylymdarda jemqorlyqty barynsha azaıtýymyz qajet. Jospardyń maqsat-mindetteri aıqyn. Ony jol kartasy úlgisinde iske asyramyz. Negizi, jospardyń jobasy bar. Jaqyn arada biz mınıstrlik ókilderimen birge atalǵan qujatty jan-jaqty pysyqtaımyz», - deıdi O.Bektenov.