Jeńis Qasymbek kásiporyndardyń tehnologııalyq bazasy nege aqsap turǵanyn túsindirdi
Bul jaıynda Úkimet otyrysynda Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.
Ónerkásip salalaryn tsıfrlandyrýǵa toqtalǵan mınıstr, «Qazirgi ýaqytta elimizdegi kóptegen kásiporyndardyń Indýstrııa 4.0-ge tolyq kóshýge tehnologııalyq jáne uıymdastyrýshylyq bazasy jetkilikti bolmaı otyr. Bul rette, 84 paıyz óńdeý jáne 56 paıyzdan astam taý-ken ónerkásip kásiporyndary Indýstrııa 2.0 deńgeıinde jumys isteıdi. Bizdiń taldaýymyzdyń barysynda Indýstrııa 4.0 elementterin engizýge kedergi bolyp otyrǵan tejeýish faktorlar anyqtaldy. Buǵan bıznesti tsıfrlandyrý arqyly túsetin ekonomıkalyq paıdany tolyq túsinbeý, otandyq zertteýlerdiń jáne avtomattandyrý men tsıfrlandyrýdyń álsiz damýy, bilikti kadrlardyń jáne qarjy men ınfraqurylymnyń jetispeýi sebep bolyp otyr», - dedi.
J. Qasymbektiń sózine qaraǵanda, osy kedergilerdi joıý úshin halyqaralyq tájirıbeni eskere otyryp, júıelik tıisti sharalar kelesi baǵyttar boıynsha ázirlendi: normatıvtik retteýdi jetildirý, tsıfrly ınfraqurylymdy, Indýstrııa 4.0 tehnologııasy boıynsha ózimizdiń tehnologııalar men onyń quziretin damytý, adam kapıtalyn, qarjylyq jáne basqa sharalardy yntalandyrý. Sondaı-aq Indýstrııa 4.0 tehnologııasyn engizýdi nasıhattaý men tsıfrlyq jobalardy iske asyrýda bızneske yqpal etý úshin modeldi tsıfrlyq fabrıkalar qurylatyn bolady. Olar tsıfrlyq tehnologııalardy nasıhattaý alańdary jáne Indýstrııa 4.0 quzyretiniń ulttyq ortalyǵy bolmaq.
«Ózimizdiń tehnologııalar men olardyń quzyrettilikterin damytý úshin ónerkásiptik avtomattandyrý jáne tsıfrlandyrý ınstıtýtyn qurý usynylady.Sondaı-aq, barlyq múddeli taraptardyń ózara is-qımyly úshin mamandandyrylǵan «Indýstrııa 4.0» tuǵyrnamasyn qurý josparlanýda»,-dedi vedomstvo basshysy.
Belgili bolǵandaı, júıeli sharalardy ázirleýmen qatar, iri kompanııalarmen tsıfrlandyrý salasynda naqty bastamalardy iske asyrý boıynsha jumystar júrgizildi. Búgingi kúni júıequraýshy kompanııalar (Qazmyrysh, ERG, ArselorMıtall Temirtaý, Qazaqmys) tsıfrlandyrý boıynsha josparlaryn qalyptastyrdy jáne oblystardyń ákimdikterimen tıisti jol kartalaryna qol qoıyldy.
«Aldymen Indýstrııa 4.0 elementteri bar júzege asyrylǵan jobalar týraly aıtyp ótkim keledi. KAZ Minerals kompanııasy Bozshakól jáne Aqtoǵaı ozyq tehnologııaly ken baıytý keshenderin iske qosty. Bul óndirister baıytý fabrıkasyn avtomatty basqarý, karer jaǵdaıyn joǵary dáldikpen monıtorıngteý júıeleri sııaqty Indýstrııa 4.0 tehnologııasynyń bazasynda jumys jasaıdy. Munyń nátıjesinde, kompanııa Bozshakóldegi 1 qyzmetshige - 105,7 mln teńgeni (308 myń AQSh dollary) quraıtyn eńbek ónimdiliginiń eń joǵary kórsetkishine qol jetkizdi, bul Qazaqstan Respýblıkasyndaǵy osy tektes óndiristerdiń kórsetkishterinen 8 ese artyq»,- dedi mınıstr.
Basqa da mysal retinde «Altyntaý Kókshetaý» AQ altyn óndiretin ken ornyn atap ótýge bolady. Onda karerdi onlaın-rejimde monıtorıngteý jáne ónerkásiptik ınternet júıesi engizilgen. Bul júıeler eńbek ónimdiligin 25 paıyzǵa arttyrýǵa múmkindik berdi.
