Jeńis Qasymbek Qarqaraly aýdanynyń túıitkilderimen tanysyp qaıtty
QARAǴANDY. QazAqparat – Qaraǵandy oblysy Qarqaraly aýdanynyń turǵyndary joldardyń nasharlyǵyna qatysty shaǵym aıtýda. Olardyń narazylyǵymen oblys ákimi Jeńis Qasymbek te kelisip otyr, dep habarlaıdy QazAqparat tilshisi.
«Bıylǵy jyly Egindibulaqtan Qarqaralyǵa deıingi joldy retke keltirýdi jalǵastyramyz. Sondaı-aq, Qarqaraly qalasynan Qaraǵandy qalasyna deıingi ýchaskeni jóndeý jumystary jalǵasady. 2020 jyly qarjylandyrý 3,5 esege artady. Respýblıkalyq jáne oblystyq bıýdjetten bul maqsattarǵa 2 mlrd teńge bólindi», - dedi Qaraǵandy oblysynyń ákimi.
Jolaýshylar kóligi jáne avtomobıl joldary basqarmasynyń basshysy Áskerbek Haltonovtyń aıtýynsha, Qaraǵandydan Shyǵys Qazaqstan oblysyna deıingi kúre joldy Qarqaraly arqyly aýqymdy qaıta qurý josparda bar. Kúrdeli jóndeýden keıin eki baǵytta da jolaqtardy 9 metrge deıin ulǵaıtý kózdelip otyr.
Aýyl ishindegi joldardyń jaǵdaıyna keler bolsaq, Áskerbek Haltonov Qaraǵaıly aýylynda joldardyń nasharlyǵyna qatysty másele sheshilgenin baıandady. Sondaı-aq, Qarqaraly qalasynda barlyq basty kósheler jóndeldi. Bul jumystar aýdandyq bıýdjetten qarjylandyrylady.
Qarqaraly aýdany boıynsha 1200 shaqyrymnan astam avtojol, onyń ishinde 192 shaqyrym respýblıkalyq mańyzy bar, 311 shaqyrym oblystyq mańyzy bar joldar ótedi.
Aýdanǵa jumys sapary barysynda Jeńis Qasymbek jol problemalary ǵana emes, sonymen qatar kólik máselelerine qatysty da saýaldar qoıdy. Qarqaraly turǵyndary oblys ortalyǵyna jetý óte qolaısyz ekenin aıtyp, shaǵymdandy. Tikeleı marshrýttyń bolmaýyna baılanysty tranzıttik avtobýstarmen júrýge týra keletinin jetkizdi. Óńir basshysyna bul másele sheshilgendigi týraly baıandaldy. Oblystyq bıýdjetten qarjylandyrylatyn Qaraǵandy – Qarqaraly reısi iske qosyldy.
Keleshekte Qarqaraly qalasyna tek jaıly jolmen ǵana emes, áýe qatynasymen de jetýge bolady. Bul jerge týrıster aǵymyn arttyrý maqsatynda ushaq reısterin iske qosý josparlanýda. Áskerbek Haltonovtyń aıtýynsha, 2020 jyly JSQ ázirleý josparlanyp otyr.
