Jeńis Qasymbek qardyń durys tazalanbaýyna baılanysty Qaraǵandy ákimdigin synǵa aldy
Óńir basshysy Qaraǵandy qalasynyń ákimdiginen jolaýshylar tasymalyn turaqtandyrýdy jáne kún sońyna deıin barlyq qala joldaryn qardan tazartýdy talap etti.
«Qaraǵandyǵa qatysty narazylyqtar jetkilikti. Qala ákimdiginiń álsiz jumysyn atap óteıin. Birinshi kezekte joldardy tazalaýǵa baılanysty. Keshe keıbir baǵyttar boıynsha qoǵamdyq kólik múlde toqtady nemese reıster jıiligi ózgerdi. Kesteden aýytqyp ketti, sonyń saldarynan aıaldamalarda ó avtobýsyn kútken adamdar sany kúrt kóbeıip ketti. Qala basshylyǵy jaǵdaıdy jetkilikti deńgeıde baǵalamady. Tipti qıyndyqtardy sheshýdiń ornyna, syrt qaldy deýge bolady. Jáne qandaı da bir pármendi sharalar qabyldanǵan joq. Kóptegen baǵyttar boıynsha, ásirese qoǵamdyq kólik boıynsha jumystar durys jasalǵan joq!», - dedi Jeńis Qasymbek TJ aldyn alý jáne joıý jónindegi oblystyq komıssııanyń otyrysynda.
Qaraǵandy qalasy ákiminiń mindetin atqarýshy Jaqsylyq Shalabekovtiń aıtýynsha, eki aýysymda qar tazalanyp, qosymsha tehnıka tartylǵan.
«Búgin 270 tehnıka shyǵyp, qosymsha 26 mashına tartyldy. 28 qańtarda tótenshe jaǵdaıdyń aldyn alý jáne joıý jónindegi komıssııanyń kezekten tys otyrysy ótti. Ákimdik rezervinen qosymsha qarjy bólý qajettiligi týraly sheshim qabyldandy. Bizdiń atymyzǵa aıtylyp otyrǵan synnyń negizi bar. Jaǵdaıdy qalypqa keltirý úshin barlyq sharalardy qabyldaımyz», - dedi Jaqsylyq Shalabekov.
Qala ákimi bıznes ıelerimen jeke aýmaqtardy tazalaý boıynsha jumystar jandandy dep tolyqtyrdy.
«Halyq sizderdiń jumystaryńyzǵa teris baǵa berýde. Men de olarmen kelisemin, dál sondaı baǵa beremin», - dep oblys ákimi berilgen jaýapqa qanaǵattanbaıtynyn bildirdi.
Aımaq basshysynyń tapsyrmasy boıynsha oblys ákiminiń orynbasary Ermaǵanbet Bólekpaev oblys ortalyǵyn aralap, qar jınaýdyń uıymdastyrylýyn tekserdi.
«Birinshi másele – mamandandyrylǵan tehnıkanyń jetispeýshiligi. Bul ásirese Maıqudyq, Prıshahtınsk, Suryptaý aýdandarynda baıqalýda. Joldaǵylarǵa kedergi keltirmeý úshin kúndizgi ýaqytta emes, túngi ýaqytta jumysty kúsheıtý qajet. Sol kezde jumys tıimdi bolady», - dep atap ótti oblys ákiminiń orynbasary.
Ol qoǵamdyq oryndarda jáne jaıaý júrginshiler joldarynda qar tazalaý qajettigine nazar aýdardy.
«Búgin joldar men kóshelerdi tazalaý jumystaryn barynsha aıaqtaý qajet. Aýlanyń ishine ótý, aýlaǵa kirý joldaryn tazalaý kerek. Jumysty táýlik boıy uıymdastyryńyzdar. Aýdan ákimderi jaǵdaıdy jeke ózi baqylap, ýchaskelerge shyǵýy tıis. Eger tehnıka jetkiliksiz bolsa, taǵy da tartyńyzdar. Barlyq jolaýshylar marshrýttary boıynsha keste saqtalýyn qamtamasyz etińizder: kólik sany jáne reıster turaqtylyǵy qajet. Men muny ózim tekseremin», - dedi Jeńis Qasymbek.
Óńir basshysy barlyq qalalar men aýdandardyń ákimderin qardyń jınalýyna jeke jaýap beretinderin eskertti.
