Jeńis Qasymbek qaraǵandylyqtar nelikten Nur-Sultannan úı alyp jatqanyn aıtty
QARAǴANDY. QazAqparat – Qaraǵandy oblysynyń ákimi Jeńis Qasymbek Qoǵamdyq keńes aldynda esep berdi, dep habarlaıdy QazAqparat.
Óńir ákimdiginiń aqparatyna sáıkes , aldaǵy jyldarǵy josparlar týraly baıandaǵan J.Qasymbek, basty basymdyq - qaraǵandylyqtardyń ómir súrý sapasyn arttyrý ekendigin atap ótti. Sonyń ishinde - qoljetimdi turǵyn úı salý.
Bıyl óńirde 420 myń sharshy metr turǵyn úı paıdalanýǵa beriledi. Bul ótken jylǵa qaraǵanda kóp. Degenmen, aımaq basshysy qala jáne aýdan ákimderine qurylys qarqynyn barlyq múmkin bolatyn tásildermen arttyrýdy tapsyrdy. 2020 jyly tek Qaraǵandy qalasynda jospar boıynsha, 400 myń sharshy metr turǵyn úı paıdalanýǵa berilýi tıis. Oblys boıynsha - 650 myń. «420 myń sharshy metr – bul bizdiń úlken oblysymyz úshin shaǵyn kórsetkish. Baspana az salynsa, naryqtaǵy básekelestik tómen bolyp qala beredi. Bul, páter baǵasynyń ósýine alyp keledi. Qaraǵandyda turǵyn úı baǵasy elordamen birdeı. Sondyqtan adamdar muny túsine otyryp, Nur-Sultannan páterler satyp alady. Turǵyn úı salynbasa, adamdar bolashaqqa kóz tastap, jospar qura almaıdy», - dedi oblys ákimi. Sondaı-aq Jeńis Qasymbek jer ýchaskelerin ınjenerlik-kommýnıkatsııalarǵa qosý máselesine nazar aýdardy. «Men oblystyń Jylý elektr stantsııalarynda bolyp qaıttym. Olardyń kópshiliginiń qosymsha qýaty bar. Biraq bizde osy qýattardy qosý úshin jylý taratý júıeleri joq. Osyǵan baılanysty biz JEO-3-ten jylýmen jabdyqtaýdyń magıstraldyq jelilerin salýdy josparladyq. Jobanyń basynda 350 mln teńge bólindi», - dedi ol. Budan basqa, kelesi jyly 22 ınjenerlik-kommýnıkatsııalyq ınfraqurylym nysanynyń qurylysyn bastaý josparlanýda. Óńir basshysy óz baıandamasynda jol jóndeý jumystaryna da erekshe nazar aýdardy. Osy jyldyń sońyna qaraı Qaraǵandy-Temirtaý jáne Soltústik-Shyǵys aınalma joldary paıdalanýǵa beriledi. Kelesi jyly Qyzylorda-Jezqazǵan trassasyn jóndeýge jobalyq-smetalyq qujattamany ázirleý aıaqtalady. Boljam boıynsha, jumystar 2020 jyldyń ekinshi jartysynda bastalady. Sondaı-aq, aldaǵy jyly Qarqaraly-Qaraǵandy jolyn jóndeý josparlanýda. Bıylǵy jyly bastalǵan Egindibulaq-Qarqaraly tas jolynda jumystar jalǵasady. Ulytaý aýdanynyń kıeli jerlerine - Han ordasy, Alashahan, Joshyhan, Dombaýyl jáne Altyn shoqy kesenelerine baratyn joldar retke keltirilýde. Jeńis Qasymbek ómir súrý sapasyn jaqsartý úshin jaqsy mektepter, jaıly jáne zamanaýı aýrýhanalar men basqa da áleýmettik nysandar qajet ekenin atap ótti. Onyń aıtýynsha, 2020 jyly oblystyq onkodıspanserdiń operatsııalyq-reanımatsııalyq blogynyń qurylysy bastalady. Oblysqa jas dárigerlerdi tartý úshin 2020 jyly olarǵa 200 vedomstvolyq páterdiń kilti tabys etiledi.
