Jeńis Qasymbek Qaraǵandyda turǵyn úı aýlalarynyń abattandyrylýyn tekserdi

Bıyl qalada jumys kólemi artqan: joldar tolyq asfalttalyp, jıekterine bordıýra tóseledi, jaryqtandyrý baǵanalary, oryndyqtar men qoqys jáshikteri ornatylady. Aýladaǵy balalar men sporttyq keshender keńeıtiledi jáne olar ártúrli bolady. Sondaı-aq kireberis joldardy jóndeý, qoqys alańdaryn jaryqtandyrý, konteınerlerdi aýystyrý jáne beınebaqylaý kameralaryn ornatý josparlanǵan.

«Búgin bizde 21 aýlada jumys júrip jatyr. Kópqabatty 38 úıdiń qasbetterin jóndeý jumystary bastaldy. Olardyń barlyǵyn osy jyldyń kúzinde aıaqtaýdy josparlap otyrmyz», - dedi Qazybek bı atyndaǵy aýdan ákimi Nurlan Rystın.

Oktıabr aýdanynyń ákimi Meıram Qojýhov qarjylandyrý áli jóndeýden ótpegen aýlalardy qamtýǵa múmkindik bergenin atap ótti. Maıqudyq, Prıshahtınsk jáne Suryptaý shaǵyn aýdandarynda 184 aýla retke keltiriledi.

Oblys ortalyǵynda qasbetter men shatyrlardy jóndeý jumystary da bastaldy. Qazybek bı atyndaǵy aýdanda 11 kósheniń boıyndaǵy, Maıqudyq aýdanyndaǵy 22 kóshede jáne Magnıtogorsk kóshesinde ornalasqan úıler jańartylady. «Jumyspen qamtýdyń jol kartasy» baǵdarlamasy boıynsha jumystar júrgizilýde. Sondaı-aq, Jumyspen qamtý ortalyǵy arqyly 3 myń adam ekbekpen qamtamasyz etiledi.

Jeńis Qasymbek qasbetterdi jóndeý kezinde biryńǵaı sáýlettik stıldi ustaný qajet ekenin atap ótti. Tarıhı kelbet buzylmaýǵa tıis.

Osy jyldyń aýqymdy jumystarynyń mańyzdy ereksheligi - jergilikti óndirýshiler shette qalmaǵanyn atap aıtýǵa bolady. Qazir aýlalardy abattandyrýda qoldanatyn barlyq materıaldar qaraǵandylyq kompanııalardyń ónimderi.