Jeńis Qasymbek qaladaǵy kóktaıǵaq týraly: Kommýnaldyq qyzmet táýlik boıy jumys istedi

ASTANA. QazAqparat – Astana ákimi Jeńis Qasymbektiń Baıqońyr aýdany turǵyndarymen kezdesýinde BAQ ókili qala kósheleri nege kóktaıǵaqtan arylmaı jatqanyn surady, dep habarlaıdy QazAqparat tilshisi.

«Bul tabıǵattyń isi ekenin jaqsy bilip tursyz ǵoı. 3-4 kúnniń ishinde bir aıdyń normasyndaı qar tústi. Esterińizde shyǵar, birinshi qar jaýyp, artynan jańbyr jaýdy. Kelesi túnde aýa temperatýrasy -30 gradýstan tómen túsip ketti. Osynyń saldarynan sáıkesinshe kóktaıǵaq paıda boldy», - dedi ákim.

Sondaı-aq ol kommýnaldyq qyzmet ókilderiniń jumysyna kóńili tolatynyn aıtty.

«Ákimdik ókilderi, kommýnaldyq qyzmet jumysshyllary ahýaldy jaqsartý úshin bar kúshin saldy. Kóktaıǵaq tek Astanada ǵana emes, osyndaı tabıǵı qubylys tirkelgen ózge eldi mekenderde de boldy. Sondyqtan qar jaýyp, onyń arty jaýynǵa ulasyp, keıin aıaz tússe, kóktaıǵaq bolady.

Kommýnaldyq qyzmet táýlik boıy jumys istedi dep esepteımin. Ádildigin aıtý kerek, kommýnaldyq qyzmet ókilderine alǵysym bar. Ókinishke qaraı, jaýyn-shashynnyń kóp mólsheri jaǵdaıdy qıyndatyp jiberdi.

Shynymen de sol kúnderi jaraqat alý kórsetkishi artty. Medıtsına qyzmetkerleri de, kommýnaldyq qyzmet ókilderi de ahýaldy barynsha túzetýge tyrysty», - dedi Jeńis Qasymbek.