Jeńis Qasymbek Investıtsııalar jáne damý mınıstrliginde jemqorlyqqa qarsy jumystardy kúsheıtýdi tapsyrdy
ASTANA. QazAqparat - QR Investıtsııalar jáne damý mınıstri Jeńis Qasymbek vedomstvo júıesindegi jemqorlyqqa qarsy jumystardy kúsheıtý boıynsha mınıstrliktiń basshylyq quramymen jınalys ótkizdi. Bul jaıynda QR Investıtsııalar jáne damý mınıstrliginiń resmı ókili Murat Jumanbaı óziniń Feısbýktegi paraqshasynda jazdy, dep habarlaıdy QazAqparat.
Jeńis Qasymbek QR IDM komıtetteriniń tóraǵalaryna baǵynyshty uıymdardyń qyzmetine, onyń ishinde olardyń qarjylyq qyzmetterine baqylaýdy kúsheıtýdy tapsyrǵan.
«Munan bólek, mınıstr baǵynyshty uıymdardyń qyzmetkerleri arasyndaǵy jemqorlyqtyń aldyn alý jáne eskertý boıynsha keshendi sharalar bóliginde mınıstrlik janyndaǵy Jemqorlyqqa qarsy is-qımyl jónindegi keńestiń jumysyn jandandyrýdy tapsyrdy», - dep jazdy Murat Jumanbaı.
