Jeńis Qasymbek ınternetke qatysty astanalyqtardyń shaǵymyna jaýap berdi
«Qalamyzda mundaı problemalar bary jasyryn emes. Negizinen qurylysy júrip jatqan jańa aýdandar men eldi mekenderde kezdesedi. Sondaı-aq ınternet qurylys qarqynyna ilese almaı kele jatqan jaǵdaı bar», - dep jazdy ol Instagram-daǵy paraqshasynda.
Ákimniń sózinshe, qurylys kompanııalaryna baılanys ǵımarattarynyń da qurylysyn eskerý tapsyrylatyn bolady. Al baılanys operatorlary men ózge de jaýapty organdar qurylysty josparlaýǵa qatysady. Bul máselelerdi J.Qasymbek Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsınmen, «Qazaqtelekom» basshysy Qýanyshbek Esekeevpen, uıaly baılanys operatorlarynyń ókilderimen jáne taǵy basqa organdarmen pysyqtaǵan.
«Qalada ınternettiń sapasyn jaqsartý úshin birneshe mehanızmdi qoldanamyz. Olar – optıkalyq baılanys jelilerin, antenna-dińgek qurylysyn, FWA (Fixed Wireless Access) tehnologııasy boıynsha bazalyq stantsııalardy ornatý. Bul jumysqa ınvestorlardy da jumyldyramyz.
Sonymen qatar jaryqtandyrý jáne elektr jelisiniń tirekteri boıynsha optıkalyq baılanys jelilerin júrgizý máselesi pysyqtaldy. Bul eldi mekenderdegi ınternet sapasyn edáýir jaqsartady. Kóktal-1, Agroqalashyq, Internatsıonalnyı, Ońtústik-Shyǵys, Promyshlennyı, Telman, Mıchýrın, Qazqalashyq, Kırpıchnyı eldi mekenderinde optıkalyq baılanys jelilerin salý jumysy júrip jatyr. Taǵy 3 eldi meken boıynsha ınvestorlar tartamyz.
Biraq munyń ózi de jetkiliksiz. Qala kúnnen kúnge ósip jatyr, al elorda turǵyndary jyl saıyn 50-60 myń adamǵa artyp keledi. Qolda bar ınfraqurylymǵa mán berip qana qoımaı, bolashaqty oılap, aldyn ala damytý qajet. Sol sebepti aldymyzda mundaı problemalar sanyn azaıtý ári qurylys kezeńinde baılanys qurylymdaryn qosa salý mindeti tur», - dedi Jeńis Qasymbek.
