Jeńis Qasymbek: Elimizde jer qoınaýynyń 20 paıyzy ǵana tolyq barlanǵan

ÓSKEMEN. QazAqparat - Óskemenge ınvestıtsııa jáne damý mınıstri Jeńis Qasymbek jumys saparymen keldi. Ol qaladaǵy birneshe zaýyttyń jumysymen tanysyp, óndiris ujymdaryna Prezıdent joldaýyn túsindirdi, dep habarlaıdy QazAqparat tilshisi.

Óskemen jylý elektr ortalyǵynyń ujymymen kezdesý kezinde mınıstrge Shyǵys Qazaqstannyń tabıǵı baılyq qoryn barlaýǵa qatysty saýal qoıyldy.

«Biz geologııalyq barlaý jumystaryn yntalandyrýǵa múddelimiz. Qazaqstanǵa kelgen ınvestıtsııanyń 3\2-si jer qoınaýyn ıgerýge baǵyttalǵany jasyryn emes. Qazirgi geologııalyq derektiń bári keńes zamanyndaǵy barlaý nátıjelerinde jasalǵan. Al bedeldi sarapshylar Qazaqstanda jer qoınaýynyń 20 paıyzy ǵana tolyq barlanǵan degen pikir aıtyp otyr. 80 paıyz qoınaýda ne bar ekenin tolyq bilmeımiz. Sol úshin Ulttyq geologııalyq nysandardyń ulttyq bazasyn jańartpaqpyz» - dedi mınıstr.

Onyń aıtýynsha, geologııalyq derekterdiń ulttyq bazasy tolyq tsıfrlandyrylmaq. Odan keıin bul derekter Halyqaralyq geologııalyq nysandar bazasyna engiziledi.

-Halyqaralyq júıege kóshken derekter álemdik bırja aqparattaryna shyǵyp turatyn bolady. Bul bizdegi áleýeti zor ken oryndary barlyq ınvestorlardyń kóz aldynda turady degen sóz. Jalpy Shyǵys Qazaqstannyń ken qory áli ondaǵan jyldarǵa jetedi, - dedi ol.