Jeńis Qasymbek elimizde eńbek ónimdiligin arttyrýǵa kedergi keltiretin faktorlardy atady
ASTANA. QazAqparat - Indýstrııa jáne ınfraqurylymdyq damý mınıstri Jeńis Qasymbek Úkimet basshysynan óńdeý ónerkásibindegi eńbek ónimdiliginiń ósimin qamtamasyz etý sharalaryn qabyldaý úshin óńirlerge tapsyrma berýdi surady, dep habarlaıdy QazAqparat tilshisi.
Úkimet otyrysynda baıandama jasaǵan Jeńis Qasymbektiń aıtýynsha, 2018 jyldyń jarty jyldyǵynyń qorytyndysy boıynsha óńdeý ónerkásibindegi eńbek ónimdiliginiń ındeksi 98,2 paıyzdy quraǵan. Óńdeý ónerkásibindegi keri dınamıka salanyń 40 paıyzdan astamyn qamtıtyn metallýrgııadaǵy eńbek ónimdiliginiń tómendeýimen baılanysty bolyp otyr.
«Kórsetkishtiń tómendeýi jyl basynan beri negizgi metall túrleri baǵalarynyń ortasha 9-20 paıyzǵa quldyraýynan bolyp otyr. Atap aıtqanda, myrysh 20 paıyzǵa, alıýmınıı 8 paıyzǵa, mys 13 paıyzǵa, qorǵasyn 23 paıyzǵa, kúmis 9 paıyzǵa tómendedi. Ótken jyly farmatsevtıka salasyndaǵy ónimdilik 138,3 paıyzdy quraǵan bolatyn. Bıyl ótken jylǵy bazanyń joǵary bolýyna baılanysty kórsetkish 17,4 paıyzǵa qysqardy», - dedi mınıstr.
Jeńis Qasymbek atap ótkendeı, kórsetkishterdiń tómendeýine qaramastan, birqatar sektorda oń dınamıka bar. Mysaly, ónimdilik kólik jasaýda 11,5 paıyzǵa, hımııa ónerkásibinde 9,2 paıyzǵa jáne jeńil ónerkásipte 1,6 paıyzǵa ulǵaıǵan.
«2018 jyldyń jartyjyldyǵynda 9 óńirde eńbek ónimdiligi ósti. Olar: Qyzylorda (153,9 paıyz), Batys Qazaqstan (126,3 paıyz), Mańǵystaý (122,9 paıyz), Qostanaı (108,7 paıyz), Aqtóbe (105,3 paıyz), Pavlodar (104,7 paıyz), Aqmola (104,2 paıyz), Qaraǵandy (100,2 paıyz) oblystary jáne Almaty qalasy (108,0 paıyz). Baqytjan Ábdiruly, memlekettik baǵdarlamada josparlanǵan óńdeý ónerkásibindegi eńbek ónimdiliginiń ósimin qamtamasyz etý sharalaryn qabyldaý úshin óńirlerge tapsyrma berýińizdi suraımyn», - dedi ol.
Sonymen birge, mınıstr eńbek ónimdiligin arttyrýǵa kedergi bolatyn taǵy bir faktor - óńdeý ónerkásibi salalaryn damytýdyń tehnologııalyq deńgeıi ekenin atap ótti.
«Óńdeý ónerkásibi kásiporyndarynyń 80 protsentinen astamy qol eńbegin nemese jartylaı avtomattandyrylǵan óndiristi qoldanyp otyr. ıAǵnı, áli avtomattandyrýǵa kóshý kezeńinde. Osyǵan baılanysty, birinshiden, qarjylyq qoldaý quraldaryn damytý arqyly kásiporyndardy jańǵyrtýdy ınvestıtsııalaýǵa yntalandyrý qajet. Kólemi men uzaq merzimdi qarjylandyrý qoljetimdiligin arttyrý, ozyq jabdyqtar men tehnologııalardy paıdalaný turǵysynan memlekettik qoldaý alatyn jobalarǵa qoıylatyn talaptardy kúsheıtý kerek. Ekinshiden, ónerkásipti tsıfrlandyrý boıynsha josparlanǵan sharalardy iske asyrýdy jalǵastyrý, onyń ishinde kásiporyndarǵa qoıylatyn tehnologııalyq talaptar men standarttardy arttyrý qajet», - dedi Jeńis Qasymbek.
