Jeńis Qasymbek depýtattardan qarjy surady
ASTANA. QazAqparat - QR Investıtsııalar jáne damý mınıstri Jeńis Qasymbek 2022 jylǵa qaraı jergilikti joldardyń 85 paıyzyn jóndemek, dep habarlaıdy QazAqparat.
«Aǵymdaǵy jylǵy bıýdjetti naqtylaý aıasynda depýtattardan oblystardyń jergilikti avtomobıl joldaryn damytý úshin transfert túrinde qosymsha aqsha bólýge qoldaý kórsetýdi ótinemiz. Búginde shamamen 80-nen 90 mlrd teńgege deıin qarjylandyrylady. Al biz Memleket basshysynyń tapsyrmasyna sáıkes bul somany 150 mlrd teńgege deıin jetkizgimiz keledi. Qazirgi ýaqytta ákimdermen tepe-teń negizde 60 mlrd teńge qarjy izdestirýdemiz», - dedi mınıstr halyqpen eseptik kezdesýi barysynda.
Onyń aıtýynsha, bul qarjy jyl saıyn 4 myń shaqyrym jergilikti mańyzdy joldardy jóndeýge jetkilikti.
«Bul joldardyń sapasyn jaqsartýǵa septigin tıgizedi. Biz 2020-2022 jyldary jergilikti joldardyń 85 paıyzyn qanaǵattanarlyq jáne jaqsy kúıge jetkizýdi josparlaýdamyz», - dedi Jeńis Qasymbek.
