Jeńis Qasymbek Buqar jyraý turǵynynyń ótinishin aıaqsyz qaldyrǵan ákimdi jumystan bosatatynyn eskertti
QARAǴANDY. QazAqparat – Buqar jyraý aýdanynyń turǵyny Jeńis Qasymbekke dúken salý úshin jer telimin ala almaı júrgenin aıtyp shaǵymdandy. Bul týraly ol oblys ákimine azamattardy onlaın qabyldaý kezinde málim etti. Aıtýynsha, Samarqand aýylynyń ákimdigi bul máseleni úsh jyldan beri sheshe almaı keledi, dep habarlaıdy QazAqparat tilshisi.
Buqar jyraý aýdanynyń ákimi Shaǵýrashıd Mamalınov muny jer ýchaskesiniń janynda avtobýstyń burylýyna oryn berilgendigimen túsindirdi.
«Bul aıdan anyq másele. Eger jer telimin bólý múmkin bolmasa, bul týraly 2018
jyly aıtý kerek edi. Kórshi ýchaskesin berińizder. Bul adamgershilikke jatpaıtyn is.
Turǵyndar bıznes quryp, jumys oryndaryn ashqysy keledi. Salyq tóleýge nıetteri bar. Nelikten úsh jyl boıy máseleni sheshý múmkindigi bolmady?
Avtobýsqa 15-20 metr alysyraq burylýǵa bolady emes pe? Muny Samarqand aýylynyń ákimi sheshýi tıis. Men sizderge 20 kún beremin. Bul kisige jer berilgen, berilmegeni jaıly maǵan esep berińizder. Eger atalmysh másele sheshilmese, Samarqand aýylynyń ákimin jumysynan bosatamyn», – dedi Jeńis Qasymbek.
Sondaı-aq, oblys ákimine Soqyr ózenin tazartý, Fedorov baý-baqsha ýchaskeleri aýdanyndaǵy jol ýchaskesin jóndeý jáne saıajaı avtobýstaryn iske qosý máseleleri boıynsha saıajaı qoǵamdastyǵynyń ókilderi júgindi.
Qaraǵandy oblysynyń Tabıǵı resýrstar jáne tabıǵat paıdalanýdy retteý basqarmasynyń aqparaty boıynsha, eki jyl buryn Fedorov sý qoımasy aýdanyndaǵy Soqyr ózenin sanatsııalaý boıynsha jumystar júrgizilgen. Jumystar oryndaldy, aktiler bar.
«JSQ-ǵa engizilgen barlyq jumystardy oryndaý qajet. Arnanyń bir bóligi ǵana tazartyldy, biraq onda 5,5 shaqyrym aýmaqta jumystar atqarylýy tıis», - dedi «Mashınostroıtel» saıajaı qoǵamynyń tóraǵasy Nıkolaı Rýdometkın.
«Búgin meniń orynbasarym men tabıǵı resýrstar basqarmasynyń basshysy sonda barady. Eger nátıje bolmasa, basqarma kemshilikterdi túzetetin bolady», - dedi Jeńis Qasymbek.
Qala mańyndaǵy avtobýstarǵa keletin bolsaq, olardy 15 sáýirde iske qosý josparlanýda.
Esterińizge sala keteıik, oblys ákiminiń karantındik shekteýlerge baılanysty
qabyldaýy ár aıdyń sońǵy jumasynda onlaın júrgiziledi. Kezdesýge tirkelý úshin ótinishti kanc_oblakimat@krg.gov.kz elektrondyq poshtasy nemese egov.kz arqyly jiberý kerek, sondaı-aq oblys ákimdigine, Álıhanov kóshesi, 13 meken-jaıy boıynsha ornalasqan front-keńsege aparýǵa bolady.
