Jeńis Qasymbek BAÁ bıznesine Qazaqstanda óndiristerdi qurý týraly usynys jasady
ASTANA. QazAqparat - QR Investıtsııalar jáne damý mınıstri Jeńis Qasymbek Birikken Arab Ámirlikteri bıznesine Qazaqstan aýmaǵynda óndiristerdi qurý týraly usynys jasady, dep habarlaıdy QazAqparat.
«Qazaqstan Eýrazııalyq ekonomıkalyq odaqtyń múshesi bolyp tabylady, onda 180 mln. adamdy qamtıtyn kedendik shekarasyz biryńǵaı naryq jumys isteýde. Sonymen qatar onyń syrtqy saýda aınalymy 1 trln. AQSh dollaryn qurap otyr», - dedi Qasymbek Qazaqstan-BAÁ bıznes-forýmynda.
Munymen qosa mınıstr Qazaqstan búginde eń úlken naryqtyń biri bolyp sanalatyn Qytaımen kórshiles ornalasqanyn eske salyp ótti.
«Elimizde bıznesti júrgizý úshin básekelestik jaǵdaılardy eskere otyryp, Qazaqstan aýmaǵynda óndiristerdi ornalastyrý múmkindigin usynamyz. Osy oraıda bul óndiristerdiń ónimderin EO-nyń, Qytaıdyń, Ortalyq Azııa elderiniń, Taıaý Shyǵystyń úlken naryqtaryna shyǵarýǵa bolady», - dep túsindirdi Jeńis Qasymbek BAÁ kásipkerlerine.
Bıznes-forýmǵa Birikken Arab Ámirlikteriniń 60-qa jýyq kompanııalary ókilderiniń jáne Qazaqstannyń 250-den astam kásipkeri qatysýda.
Onyń atap ótýinshe, 2015 jylmen salystyrǵanda 2016 jyly eki el arasyndaǵy taýar aınalymy kólemi úsh esege artty .
«Táýelsizdik alǵannan bergi ýaqytta Qazaqstanǵa BAÁ-niń tikeleı ınvestıtsııasy 2 mlrd. AQSh dollaryna jetti. Sonymen qatar Qazaqstan BAÁ ekonomıkasyna 900 mıllıonnan astam AQSh dollaryn ınvestıtsııalady. Búginde Ámirlikter bıznesiniń qatysýymen elimizde birlesken 200-ge tarta kásiporyn jumys isteýde», - dep naqtylady mınıstr.
