Jeńis Qasymbek avtomobıl shyǵarý óndirisi ne sebepti artqanyn túsindirdi
ASTANA. QazAqparat - 2018 jyldyń 8 aıynyń qorytyndysy boıynsha satylǵan árbir ekinshi avtomobıl otandyq óndiriske tıesili.
Bul týraly Astanada Qazaqstan mashına jasaýshylarynyń VI Forýmynda QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.
«Mashına jasaý salasy ındýstrıaldy-ınnovatsııalyq damý memlekettik baǵdarlamasynyń basym baǵyty. 2018 jyldyń 8 aıynyń qorytyndysy boıynsha mashına jasaý óndirisiniń kólemi 638,1 mlrd teńgeden asyp, óndiristiń ósimi 13,8 paıyzdy qurady. Avtomobıl quraý mashına jasaý salalary arasynda eń úlken ósim qarqynyn baıqatty. Bıyl 8 aıda jalpy quny 117,7 mlrd teńge bolatyn 19 myńnan asa avtomobıl shyǵaryldy (FKI 150,1%). Bul ótken jyldyń sáıkes kezeńimen salystyrǵanda 1,6 esege kóp», - dep atap ótti mınıstr.
«Óndiristiń kúrt ósýine naryqtaǵy suranystyń artýy, eksporttyq naryqtardyń ashylýy, sondaı-aq memleket tarapynan daıyndalǵan jeńildetilgen avtonesıe men lızıngtik qarjylandyrý baǵdarlamalary sebep boldy. Bul baǵdarlamalar avtomobıl jasaý sektorynyń damýyna oń serpin berdi. Eger 2017 jyly satylǵan árbir úshinshi avtomobıl otandyq kásiporyndarda shyǵarylǵan bolsa, 2018 jyldyń 8 aıynyń qorytyndysy boıynsha satylǵan árbir ekinshi avtomobıl otandyq óndiriske tıesili», - dep túsindirdi vedomstvo basshysy.
Onyń sózine qaraǵanda, aldaǵy jyly jeńildetilgen nesıelendirý (10 mlrd teńge somasynda) jáne kommertsııalyq tehnıkany lızıngti qarjylandyrý (30 mlrd teńge) baǵdarlamalaryn jalǵastyrý josparlanyp otyr.
