Jeńis Qasymbek aýyldardy aýyz sýmen qamtýdyń jańa tetikterin usyndy
ASTANA. QazAqparat - Úkimet otyrysynda baıandama jasaǵan QR Investıtsııalar jáne damý mınıstri Jeńis Qasymbek aýyldy eldi mekenderdi aýyz sýmen qamtýdyń jańa mehanızmderin usyndy, dep habarlaıdy QazAqparat tilshisi.
«Bıyl Qazaqstannyń 2025 jylǵa deıingi Strategııalyq damý jospary bekitildi. Osyǵan baılanysty halyqty ortalyqtandyrylǵan sýmen jabdyqtaý úshin qalalardy 100 paıyz, aýyldardy 80 paıyz deńgeıde qamtamasyz etýimiz kerek», - deıdi Jeńis Qasymbek.
Onyń aıtýynsha, Memleket basshysy óz Joldaýynda Úkimetke aýyldardy aýyz sýmen qamtý úshin jyl saıyn 100 mlrd teńgege deıin qarajat qarastyrýdy tapsyrǵan. Atalǵan mindetterdi oryndaý úshin mınıstr Óńirlerdi damytý baǵdarlamasyna mynadaı ózgeristerdi engizý qajet dep esepteıdi.
«Sektordy odan ary damytýdyń jańa baǵyttary men jobalardy qarjylandyrýdyń jańa mehanızmderin qarastyrý qajet. Sondaı-aq, ındıkatorlardy ózektendirý kerek. Sektordy odan ary damytýdyń jańa baǵyttaryna qatysty sý arnalarynyń óndiristik protsesterine keshendi tehnoloııalyq jańǵyrtý júrgizý qajet. Birinshiden, sýmen jabdyqtaý júıelerin tolyq avtomattandyrý kerek. Ekinshiden, bıýdjet shyǵyndaryn azaıtý maqsatynda zamanaýı tehnologııalardy qoldanǵan jón», - deıdi mınıstr.
Jeńis Qasymbektiń aıtýyna qaraǵanda, bıyl jyldyń sońyna deıin mınıstrlik «E-Shanyraq» biryńǵaı ınttellektýaldy aqparattyq júıesin qurýdy aıaqtaıdy.
«Sýmen jabdyqtaý jáne sý tartý sektoryn kommertsııalandyrý maqsatynda «Nurly jol» baǵdarlamasynda bastalǵan qaıtarymdy qarjylandyrý mehanızmderin odan ary qoldaný jalǵasyn tabady. Búgingi kúni EDQB áriptestik aıasynda sýmen jabdyqtaý jáne sý tartý júıelerin jańǵyrtý boıynsha jalpy quny 24,4 mlrd teńge bolatyn 13 jobany iske asyryp jatyr», - dedi Jeńis Qasymbek.
