Jeńis Qasymbek Atyraý oblysyndaǵy qurylysy bitpeıtin kópir týraly aıtty
ASTANA. QazAqparat - Búgin Májilistiń jalpy otyrysynda depýtat Baqtyqoja Іzmuhambetov Atyraý oblysy Mahambet aýdanyndaǵy jańa kópirdiń qurylysyn aıaqtaýdy jyldamdatý máselesin kóterdi, dep habarlaıdy QazAqparat.
«Men Parlament Májilisinde úshinshi jyl istep jatyrmyn. Atyraý oblysynda ákim bolǵanymda Elbasyna óńirdegi Mahambet aýdanyndaǵy kópirdiń asa qajet ekenin baıandaǵan edim. Memleket basshysy sol kópirdi salý boıynsha qarjy bólýdi Úkimetke tapsyrǵan bolatyn. Sodan beri biraz jyldar ótti, degenmen kópir áli bitken joq. Ótken jyly aıaqtalýy tıis edi, sonymen qatar bıyl jyldyń sońynda tapsyrylyp qalýy múmkin degen úmit boldy. Qazirgi qaralyp otyrǵan bıýdjet boıynsha 500 mln teńge bólingen. Budan bólek, qaralyp otyrǵan qarjy aıasynda 2020 jylǵa deıin jospar jasalǵan eken. Sonda taǵy da eki jyl kútý kerek pe?», - dep surady depýtat Baqtyqoja Іzmuhambetov.
Óz kezeginde QR Investıtsııalar jáne damý mınıstri Jeńis Qasymbek ótken aptada issaparmen atalǵan aýdanǵa baryp, kópirdiń qurylysymen tanysqanyn jetkizdi.
«Jalpy kópirdiń quny 9,5 mlrd teńge, ony 6,5 teńgesi kezinde jergilikti bıýdjetten, al respýblıkalyq bıýdjetten 1,5 mlrd teńge bólindi. Endi osy bıýjette 500 mln teńge bar. Biraq jobany tolyqtaı iske qosý úshin taǵy da 1,5 mlrd teńge kerek», - dep toqtaldy mınıstr.
J. Qasymbektiń atap ótýinshe, bıýdjette Atyraý oblysynyń jergilikti joldaryna 4,5 mlrd teńge qarastyrylyp otyr. Onyń 1,1 mlrd teńgesi óńir bıýdjetiniń ózinen bolsa, qalǵan 3 mlrd teńgeden astam qarjy respýblıkalyq baǵyttan bólinedi.
«Oblys ákimdigi bizge qaı jer men jolǵa qansha qarjy kerektigin túsindirýi kerek. Biz bólip otyrǵan somanyń 1,5 mlrd teńgesin oblys qajet bolsa sol kópirge jumsaýǵa múmkindigi bar jáne bul máseleni qarastyrýǵa daıynbyz», - dep túıdi mınıstr.
