Jeńis Qasymbek Astana jáne Ońtústik AEA aýmaqtaryn keńeıtýdi usyndy
ASTANA. QazAqparat - Úkimettiń búgingi otyrysynda QR Investıtsııalar jáne damý mınıstri Jeńis Qasymbek Astana men Shymkenttegi Ońtústik AEA aýmaqtaryn keńeıtýdi usyndy, dep habarlaıdy QazAqparat tilshisi.
«Óńirler Astana AEA jáne Shymkent qalasyndaǵy Ońtústik AEA aýmaqtaryn keńeıtý máselesin qoıyp otyr. 600 gektar bolatyn Astana arnaıy ekonomıkalyq aımaǵynda 26 gektar ǵana bos jer qaldy. Sondyqtan, aýmaǵy 433 gektar bolatyn ekinshi park qurylysyn bastaý máselesin sheshý kerek», - dedi Jeńis Qasymbek.
Mınıstr bul másele boıynsha tehnıka-ekonomıkalyq negizdeme ázirlengenin habarlady.
«Aýmaǵy 200 gektar bolatyn Ońtústik arnaıy ekonomıkalyq aımaǵynda da dál osyndaı másele. Onda 13 gektar bos jer qaldy jáne jaqyn arada aýmaqty keńeıtý qajet bolady. Ákimdik AEA janynan rezervtik aýmaq daıyndap qoıdy», - dep túsindirdi ol. Sondaı-aq, QR IDM basshysy damýshy elderde ónerkásiptik ınfraqurylymdy damytýdyń ınvestıtsııa tartýda jáne ındýstrııany ilgeriletýde mańyzy zor ekenin atap ótti.
«Mundaı alańdar Qazaqstanda arnaıy ekonomıkalyq jáne ındýstrııalyq aımaqtar bolyp tabylady», - dedi J.Qasymbek. Mınıstr keltirgen derekterge sáıkes, álemde shamamen 3,5 myńǵa jýyq AEA bar. Onyń 30%-ǵa jýyǵy sol kúıi iske aspaǵan, al 70% tolyq qurylǵan jáne 1% ǵana, shamamen 25-30 AEA orasan tabystarǵa qol jetkizip, eldiń ekonomıkalyq damýyna yqpal etken. Mundaı AEA qataryna Birikken Arab Ámirlikterindegi Djebel Alıdi, Qytaıdyń Shanhaı qalasyndaǵy Shenjendi, Sıngapýrdaǵy Djýrongty jáne Irlandııadaǵy Shenondy qosýǵa bolady.
