Jeńis Qasymbek «Astana-Pavlodar» avtojolynyń qurylys barysyn tekserdi
ASTANA. QazAqparat - Búgin QR Investıtsııalar jáne damý mınıstri Jeńis Qasymbek jumys saparymen Pavlodar oblysyna baryp, salynyp jatqan Astana-Pavlodar avtojol ýchaskesindegi jumystyń uıymdastyrylý deńgeıin qadaǵalady. Sondaı-aq, merdiger uıym ókilderimen jedel keńes ótkizdi, dep habarlaıdy QazAqparat mınıstrliktiń baspasóz qyzmetine silteme jasap.
Keńeske «Qazavtojol» UK» AQ men onyń Aqmola men Pavlodar oblystaryndaǵy fılıaldarynyń, «Aqmolajollaboratorııa» jáne «Pavlodarjollaboratorııa» respýblıkalyq memlekettik mekemeleriniń basshylyǵy, sonymen birge, Astana-Pavlodar avtojoly jobasynyń qurylysyna tartylǵan barlyq merdiger uıymdardyń basshylary qatysty.
Qasymbek óz sózinde «Nurly jol» memlekettik baǵdarlamasy aıasynda júzege asyp jatqan bul jobanyń strategııalyq mańyzyn aıryqsha atap ótti. Sondaı-aq, mınıstr qurylys jumystaryn josparlanǵan merzimde jáne joǵary sapada júrgizý kerektigine toqtaldy.
Kezdesý barysynda merdigerlerdiń tehnıkalyq jabdyqtary, jol qurylysy materıaldaryn daıyndaý sııaqty taǵy basqa da máseleler talqylandy.
Eske sala ketsek, «Astana-Pavlodar» avtojol ýchaskesiniń uzyndyǵy 441 shaqyrym. Jóndeý jumystaryn júzege asyrý kezeńi 2013-2018 jyldar. Qazirge deıin ýchaskeniń 59 shaqyrymy paıdalanýǵa berilgen.
