Jeńis Qasymbek Astana qosymsha jylýmen qalaı qamtamasyz etiletinin aıtty
«Qalany qosymsha kólemde jylýmen qamtamasyz etý úshin ótken jyly eki gaz jylý stantsııasynyń qurylysy bastalǵan bolatyn. Elordany aralaý barysynda «Turan» jáne «Ońtústik-Shyǵys» gaz jylý stantsııalarynyń qurylysymen tanystym. Olardyń qýaty qurylysy uzaqqa sozylyp ketken JEO-3-ten asyp túsedi», - dep jazdy ákim Instagram-daǵy paraqshasynda.
Aıtýynsha, atalǵan eki gaz jylý stantsııasyn bıylǵy jylytý maýsymynda kezeń-kezeńimen iske qosý josparlanyp otyr.
«Sonymen qatar merdigerge JEO-3 qurylysyn bıyl aıaqtaý mindeti júkteldi. Osy sharalardyń bári jylýmen jabdyqtaý kólemin edáýir ulǵaıtýǵa, sol sııaqty bolashaqta qurylys jumysy júretin aýdandardy jylýmen qamtýǵa múmkindik beredi», - deıdi qala basshysy.
Aıta keteıik, keshe Májilis depýtaty Erlan Saırov bıyl Astana jylýsyz qalýy múmkin degen boljam aıtty.
Málim bolǵandaı, «Amanat» partııasy janyndaǵy Sybaılas jemqorlyqqa qarsy is-qımyl jónindegi respýblıkalyq keńestiń jumys toby Astana qalasynyń JEO-3 qurylysyna partııalyq baqylaý júrgizgen. Onyń quramyna Májilis depýtattary, Bas prokýratýranyń, Astana ákimdiginiń, Qarjy monıtorıngi agenttiginiń jáne Sybaılas jemqorlyqqa qarsy is-qımyl agenttiginiń ókilderi kirdi.
«Qoǵamdyq baqylaý týraly» Zańǵa sáıkes, biz elordadaǵy JEO-3 qurylysynyń sapasyna baqylaý júrgizemiz. Nysannyń qurylysy 2010 jyldan beri júrgizilip kele jatqanyn bilemiz, bul – uzaq protsess. Adamdar Astanada jylýdyń jetispeıtindigine shaǵymdanady. Sondyqtan, bıyl qala belgili bir dárejede jylýsyz qalýy múmkin degen qaýip bar», - degen bolatyn keńes tóraǵasy, Májilis depýtaty Erlan Saırov.
