Jeńis Qasymbek aldaǵy bes jyldaǵy basymdyqtardy atady
QARAǴANDY. QazAqparat – Qaraǵandy oblysyn damytýdyń jańa formattaǵy besjyldyq baǵdarlamasynda basty basymdyqtar turǵyn úı salasy men ınfraqurylymdyq damýǵa beriledi. Bul týraly aımaq basshysy – «Nur Otan» partııasy fılıalynyń tóraǵasy Jeńis Qasymbek oblystyq máslıhatta óken depýtattyq fraktsııasynyń keńeıtilgen otyrysynda aıtty.
Onyń aıtýynsha, memlekettik qyzmetshilerdiń jumysynyń tıimdiligin baǵalaýda turǵyndardyń ál-aýqaty basty orynǵa qoıylatyn bolady.
«Memlekettik josparlaý júıesiniń basty qujattarynyń biri – bes jyldyq kezeńge arnalǵan oblysty damytý baǵdarlamasy bolyp tabylady. Tıimdilik pen nátıjelilikke qol jetkizý úshin ol qujat ózgerister men tolyqtyrýlarǵa ushyraıdy. Búgin oblystyq máslıhattyń kezekten tys sessııasynda Qaraǵandy oblysynyń 2016-2020 jyldarǵa arnalǵan Damý baǵdarlamasy bekitildi. Maqsatty ındıkatorlar sany 126-dan 51-ge deıin aıtarlyqtaı qysqartyldy. Baǵdarlamaǵa halyqtyń tabysy men ómir súrý sapasyn sıpattaıtyn ındıkatorlar engizilgen. Olar jergilikti atqarýshy organdardyń qyzmetin baǵalaý úshin negizgileri bolyp aıqyndalǵan», - dedi Jeńis Qasymbek.
Oblys ákimi mundaı tapsyrma Qazaqstan halqyna arnalǵan Joldaýda aıtylǵanyn atap ótti. «Mundaı tásil árbir óńirdiń oblys ekonomıkasynyń damýyna qosqan úlesin jaqsy baǵalaýǵa jáne memlekettik qyzmetshilerdiń nátıjelerge qol jetkizýdegi jaýapkershiligin arttyrýǵa múmkindik beredi», - dedi Jeńis Qasymbek. Otyrysta partııalyq baqylaý komıssııasynyń músheleri ózderiniń tekserýleri týraly aıtyp berdi. Máslıhat depýtattary men jurtshylyq ókilderi áleýmettik sala men ekonomıkany kóterýge qatysty ózekti máselelerdi kóterdi. Mektep oqýshylarynyń tamaqtanýy, ekologııa, joldardyń jaǵdaıy týraly aıtyldy. «Joldardy jóndeý men salýǵa barlyq qalalar men aýdandardyń bıýdjetteri eselep ulǵaıýda. Jergilikti jeli boıynsha kelesi jyly 50 de 50 qaǵıdatynyń arqasynda respýblıkalyq bıýdjetten artyq qarajat alamyz. Oblys boıynsha osy jylǵa qaraǵanda 30-40% artyq somany jolǵa jumsaýdy josparlap otyrmyz», - dedi aımaq basshysy. Oblys ákimi 2020 jyly Jezqazǵan – Qyzylorda avtojolyn qaıta jańartý bastalatynyn aıtty. Qazir JSQ ázirlenýde. Sondaı-aq ol Qaraǵandy-Jezqazǵan avtojolyn jóndeý kózdelip otyrǵanyn jetkizdi.
