Jeńis Qasymbek AEA ınfraqurylymyn jasaqtaý jumysyn synǵa aldy
ASTANA. QazAqparat - QR Investıtsııalar jáne damý mınıstri Jeńis Qasymbek arnaıy ekonomıkalyq aımaqtardyń damýyna kedergi keltiretin basty sebepterdi atady, dep habarlaıdy QazAqparat tilshisi.
Mınıstrdiń aıtýynsha, ınfraqurylym qurylysynyń baıaý júrgizilýi arnaıy ekonomıkalyq aımaqtardy damytýdyń basty kedergisi bolyp otyr.
«AEA damýyna kedergi keltirip otyrǵan júıeli máselelerdiń biri ınfraqurylym qurylysynyń baıaý júrgizilýi. Álemdik tájirıbede ınfraqurylym qurylysynyń ortasha merzimi úsh jyldy quraıdy. Bizdegi birqatar AEA-da bul merzim 5-6 jylǵa sozylyp ketti», - dedi Jeńis Qasymbek Úkimettiń búgingi otyrysynda.
Ol Astana men Ulttyq ındýstrııalyq munaı-hımııa tehnoparki (UIMHT) arnaıy ekonomıkalyq aımaqtarynyń qurylǵanyna 10 jyl tolǵanyn jáne ınfraqurylymnyń tolyq aıaqtalmaǵanyn atap ótti. Astana AEA 60 ýchaskesi áli kúnge deıin jylýmen qamtamasyz etilmegen.
«Pavlodar AEA ınfraqurylymyna 3-4 mlrd teńge bólindi jáne onyń ınfraqurylymynyń daıyndyǵy 20% ǵana quraıdy. Investorlar úlken qyzyǵýshylyq tanytyp otyrǵandyqtan, Pavlodardaǵy 650 ga bolatyn AEA qurylysyn aıaqtaý kerek. Ákimdiktiń derekterine sáıkes, yqtımal ınvestorlar bar, sondyqtan qalǵan tórt AEA qurylysyn aıaqtaý qajet. Olar Astana, Pavlodar, Aqtaý teńiz porty jáne UIMHT. Sonymen birge, qurylys kezeńderi men suralatyn somalardy tıimdirek paıdalanýdy suraımyn», - dep tolyqtyrdy Jeńis Qasymbek.
