Jeńis Qasymbek: AEA-ǵa neǵurlym tıimdi basqarýshy kompanııalardy tartý kerek
NUR-SULTAN. QazAqparat - Arnaıy ekonomıkalyq jáne ındýstrııalyq aımaqtardy damytý boıynsha keıbir oblystarda jumys baıaý júrip jatyr. Úkimet otyrysynda Premer-mınıstrdiń orynbasary Jeńis Qasymbek osylaı málim etti, dep habarlaıdy QazAqparat tilshisi.
«Bir aı buryn arnaıy ekonomıkalyq jáne ındýstrııalyq aımaqtar týraly zańǵa birqatar ózgerister engizildi. Ol ózgeristerdiń kóbin ákimdikter usynǵan. Qazirgi ýaqytta arnaıy ekonomıkalyq jáne ındýstrııalyq aımaqtardyń birqatary bekitilgen josparǵa sáıkes jumys istemeıdi. Búgin ol týraly mınıstr Roman Sklıardyń baıandamasynda aıtylyp ketti. Jalpy, bıýdjetten 1 teńgege ortasha alǵanda 2,1 teńge ınvestıtsııa keldi. Ol ortasha kórsetkish. Birqatar oblystarda odan da tómen», - deıdi Jeńis Qasymbek Úkimet otyrysynda.
Onyń aıtýynsha, bul jerde mańyzdy másele - basqarýshy kompanııalardyń jumysy.
«Osy aımaqtardyń kóbinde basqarýshy kompanııalardyń jumysy joǵary deńgeıde emes. Olardyń óz shyǵyndaryn tóleýge shamasy joq. Sondyqtan, tek oblystyq bıýdjetke qarap otyr. Ol durys emes dep sanaımyz. Sol sebepten, tıimdi basqarýshy kompanııalardy tartý boıynsha neǵurlym belsendi jumys júrgizý kerek. Ol ákimdikterdiń mindeti.
Jalpy, qazirgi ýaqytta jańa zań kóp máselelerdi sheship otyr. Endi myna baǵdarlama boıynsha oblystar kórsetkishterge jetý kerek dep esepteımiz», - deıdi Jeńis Qasymbek.
Eske sala ketsek, búgingi Úkimet otyrysynda QR Indýstrııa jáne ınfraqurylymdyq damý mınıstri Roman Sklıar 2021 jyly arnaıy ekonomıkalyq aımaqtarda 2 trln teńgeniń jobasy iske asatynyn habardar etken bolatyn.
Óz kezeginde Úkimet basshysy Asqar Mamın arnaıy ekonomıkalyq jáne ındýstrııalyq aımaqtardy damytýǵa qatysty birqatar tapsyrma berdi.
