Jeńis Qasymbek: 118 mlrd teńgeden asa ınvestıtsııa tarttyq, 2 myń jumys orny qurylady

ASTANA. QazAqparat – Astana ákimi Jeńis Qasymbek óziniń Facebook paraqshasynda elordada 30-ǵa jýyq jobany júzege asyrǵaly otyrǵanyn jazdy, dep habarlaıdy QazAqparat.

«Qalanyń damýy úshin jeke ınvestıtsııalar da tartylýda. Bıyl 30-ǵa jýyq jobany iske qosýdy josparlap otyrmyz. Jeke ınvestıtsııalardyń jalpy somasy — 118 mlrd teńgeden asady. 2 myńnan astam jumys orny qurylady. Olar — ónerkásip, medıtsına, agroónerkásiptik keshen salalaryndaǵy kásiporyndar, bilim berý salasyndaǵy 5 nysan (mektepter, balabaqshalar), logıstıka salasyndaǵy 4 joba, sport keshenderi jáne t.b.

Búgin Indýstrııa jáne ınfraqurylymdyq damý mınıstri Marat Qarabaevpen birge №1 Indýstrııalyq parkte birqatar kásiporynnyń jumysymen tanystyq. Olardyń qatarynda ModeX modýldik úı qurylysy zaýyty, mamandandyrylǵan tehnıka qurastyrý zaýyty, vıtrajdar, terezeler, medıtsınalyq jabdyqtar, jıhazdar, respıratorlar jáne t.b. bar. Kásiporyn ókilderimen birge №1 ındýstrııalyq park boıynsha ózekti máselelerdi talqyladyq»,-dep jazdy ákim.

Onyń sózinshe, Memleket basshysynyń tapsyrmasy boıynsha ınvestıtsııalardy jumyldyrý jáne ınvestorlardy qoldaý úshin qolaıly jaǵdaılar jasalady.