«Jeńis» fýtbolshysy jol apatynan qaza tapty

ASTANA. KAZINFORM —  Áıelder komandasy «Jeńis» fýtbolshysy Vıktorııa Kaısarınova 23 qyrkúıekte bolǵan jol apatynan kóz jumdy.

Komanda málimetinshe, Kaısarınova Astana men Pavlodardy jalǵaıtyn tas jolda bolǵan jol-kólik oqıǵasynyń saldarynan kóz jumǵan. Belgili bolǵandaı, fýtbolshy otyrǵan kólik júrgizýshisi qozǵalys qaýipsizdigin qamtamasyz etpeı, qashyqtyqty saqtamaǵandyqtan, kólik júk kóligimen soqtyǵysqan.

Komanda Vıktorııa Kaısarınovanyń týǵan-týystary men jaqyndaryna kóńil aıtyp, onyń jarqyn oıynshy ári naǵyz dos bolǵanyn atap ótti.

— «Jeńis» fýtbol klýby Vıktorııa Kaısarınovanyń otbasy men jaqyndaryna osy qaıǵyly jaǵdaıǵa baılanysty tereń qaıǵyryp, kóńil aıtady.

Búgin Pavlodar-Astana tas jolyndaǵy jol-kólik oqıǵasy saldarynan bizdiń komandanyń fýtbolshysy Vıktorııa Kaısarınova kóz jumdy. Júrgizýshi jol qozǵalysy qaýipsizdigin qamtamasyz etpeı, araqashyqtyqty saqtamaǵan. Saldarynan júk kóligimen soqtyǵysqan.

Bul jaǵdaıǵa áli de sený qıyn. Bul bizdiń búkil klýb úshin aýyr jáne orny tolmas qaza. Vıktorııa jarqyn oıynshy jáne naǵyz dos boldy. Biz onyń otbasymen, týystarymen jáne jaqyndarymen birge qaıǵyramyz. Ol bizdiń júregimizde máńgi saqtalady, — delingen habarlamada.

Aıta ketelik Batys Qazaqstanda jol apattary saldarynan 50-den astam adam kóz jumdy.