«Jeńis alaýy» úshtomdyǵynyń tusaýy kesildi
Jınaq avtorlary Uly Otan soǵysynyń ardageri, QHA múshesi Leonıd Gırsh, belgili qoǵam qaıratkerleri Murat Áýezov, ádebı sholýshy Elena Brýsılovskaıa búgin tusaýkeser sharasyna qatysty.
Tanystyrylym sońynda Uly Otan soǵysynyń ardagerleri men tyl eńbekkerleri, Qazaqstan halqy Assambleıasynyń músheleri, qoǵam qaıratkerleri mereıtoılyq medaldarmen marapattaldy.
Merekelik shara Almaty qalasyndaǵy Dostyq úıiniń aldyndaǵy alańda Uly Otan soǵysyndaǵy Jeńistiń 70 jyldyǵyna arnalǵan «Qaharmandyqtyń máńgilik ǵıbraty» Assambleıa forýmymen jalǵasty. Saltanaty is-sharaǵa qatysqan Qazaqstan halqy Assambleıasynyń músheleri, Uly Otan soǵysynyń 120-dan astam ardageri, jastar birlestikteriniń músheleri men qala turǵyndary Jeńistiń Qazaqstan halqy úshin qandaı mańyzy baryn tilge tıek etti.
Forým barysynda soǵys ardagerleri men tyl eńbekkerlerine arnalǵan teatrlandyrylǵan kórsetilim qoıylyp, Qazaqstan halqy Assambleıasy atynan estelik syılyqtar tabys etildi.
Aıta keteıik, jańa úshtomdyqta Uly Otan soǵysyna qatysqan qazaqstandyqtar týraly áńgimelengen. Jınaq maıdanǵa qatysqan ardagerlerdiń estelikterinen quralǵan.
Birinshi tomǵa biregeı basylym - «Rýkopısnyı jýrnal frontovoı brıgady» engizilgen. Jýrnaldy 1945 jyldyń sáýirinde ony qurastyrýshylardyń biri, almatylyq Nıkolaı Antonovıch Rabotıagov ákelgen bolatyn. Alysta qalǵan jyldardyń bul kónekóz jádigeri keńes jaýyngerleriniń qalaı tirshilik etip, qalaı soǵysqanyn baıandaıdy.
Ekinshi tomda Qazaqstannyń barlyq óńirlerinde turatyn qazaqstandyq jaýyngerler týraly jýrnalıstik materıaldar jınaqtalyp, «Sarbaz taǵdyry» taraýymen ashylǵan.
Kelesi bólimniń ataýy - «Ý voıny ne jenskoe lıtso», munda soǵysqa qatysqan áıelder týraly materıaldar berilgen. Soǵys jyldary maıdanda túrli áskerı quramalarda 800 myńnan astam áıel qyzmet etti.
«Barlyǵy - jeńis úshin!» bóliminde tyl eńbekkerleri týraly áńgimelenedi.
Úshinshi tom «Árdaıym júregimizdesizder!» dep atalatyn úlken bólimmen ashylady, munda soǵysqa qatysýshylar týraly olardyń balalary men nemereleri aıtqan estelikter jınaqtalǵan.
Tom «Maıdan alańynan jetken óleńder» atty bólimmen aıaqtalady. Soǵys ýaqyty týraly aqyndar Muzafar Álimbaev, Saǵynǵalı Seıitov, Leonıd Skalkovskıı, Baqytjan Qanapıanov, Aleksandr Belotserkovskıı, Oljas Súleımenov, Raýshan Búrkitbaeva-Núkenova jáne basqalar jyr tolǵaıdy.
