Jeńilmegen qazaq boksshysy Aıdos Erbosynuly kelesi qarsylasynan jaýap kútip júr

NUR-SULTAN. QazAqparat - Jeńilip kórmegen qazaqstandyq boksshy Aıdos Erbosynuly kelesi jekpe-jegi jaıly aıtty, dep habarlaıdy QazAqparat.

«Absolıýtti álem chempıony áıgili Kanelomen bir aıdan asa ýaqyt sparrıng jumystaryn ótkizip, sparrıngter lageri óz máresine jetti. Men úshin óte jaqsy tájirıbe boldy. Biraz ótimdi tásilder úırenip, keremet shyńdaldyq. Kelesi jekpe jegim, Alla buıyrsa WBA nusqasy boıynsha álem chempıony kýbalyq Devıd Morrelge qarsy ótý kerek. Óıtkeni men osy versııa boıynsha álem chempıony belbeýine mindetti úmitkermin. Úlken jekpe-jek bolǵan soń bári ońaı sheshile salmaıdy. Biraz ýaqyt boldy qarsylasymyzdan jaýap kútip júrmiz. Ázirge tynysh bop tur, biraq mindetti túrde jaýap bereri haq. Ol daıyn bolsa, biz daıyn» dep jazdy sportshy Instagram paraqshasynda.

Degenmen Boxrec.com saıtynyń jazýynsha, kýbalyq boksshy 4 maýsymda sýperorta salmaqtaǵy WBA álem chempıony tıtýly úshin amerıkalyq Kelvın Hendersonmen aıqasqa shyǵady.

Aıta keteıik, Aıdos Erbosynuly elordadaǵy «Kóshpendiler shaıqasy-2» boks básekesinde qarsylasyn nokaýtpen jeńgen bolatyn.

Onyń qanjyǵasynda sýperorta salmaqtaǵy WBC ABC, WBA International jáne WBO Global belbeýleri bar.