Jeńilis taýyp kórmegen brıtandyq boksshy Jaqııanovpen kezdeskisi keledi
ASTANA. QazAqparat - Brıtandyq boksshy Raıan Barnett (15-0, 9 KO) aǵymdaǵy jyly qazaqstandyq Janat Jaqııanovpen (27-1, 18 KO) jekpe-jek ótkizýdi josparlaýda.
Sports.kz-tiń Sky Sports-qa silteme jasap habarlaýynsha, buryn Jaqııanovpen birge jattyqqan Barnett jeńil salmaqtaǵy qazaqstandyq boksshynyń WBA Super nusqasy boıynsha álem chempıony ataǵyn tartyp ala alatynyna senimdi.
«Biz Jaqııanovpen birge Rıkkı Hattonnyń jetekshiligimen bir zalda jumys istedik. Ol myqty boksshy jáne dıvızıonnyń kóptegen jaýyngerleri odan alshaq júretin. Biraq men bul aıqastyń bolǵanyn qalaımyn jáne jeńiske jetemin dep oılaımyn», - dedi Barnett.
Eske salaıyq, 11 aqpan kúni Janat Jaqııanov amerıkalyq Roshı Ýorrendi (14-2, 4 KO) jeńip, WBA Super jáne IBO-nyń jeńil salmaqtaǵy tıtýlyna ıe boldy.
Qazaqstandyq boksshy atalmysh jeńisinen keıin Boxingscene.com reıtınginde toǵyzynshy orynnan ekinshige kóterildi. Sondaı-aq Jaqııanovtyń jeńip alǵan WBA Super jáne IBO belbeýleri, Qazaqstandy kásipqoı bokstaǵy tıtýldar sany boıynsha álem elderiniń bestigine engizdi. Endi qazaqstandyqtardyń qorjynynda tórt belbeý: úsheýi (WBA Super, WBC jáne IBF) Gennadıı Golovkınde (36-0, 33 KO) jáne bireýi (WBA Super) Jaqııanovta bar. Odan bólek, eki boksshy da IBO tıtýlyn ıemdengen. Alaıda, salystyrmaly túrde onyń bedeli tómen bolyp eseptelinedi. Qazaqstan chempıondyq tıtýldar sany boıynsha besinshi oryndy Fılıppınmen bólisedi. Birinshi oryndy AQSh (12) alsa, keıingi oryndarda Ulybrıtanııa (9), Japonııa (8) jáne Meksıka (7) tur.
