Jeńilis tapsań da, jeńisten úmit úzbeý kerek-Dına Jolaman
Dına Jolamannyń esimi qazir sportsúıer qaýymǵa jaqsy tanys. Shaǵyn ǵana aýyldan túlep ushqan bylǵary qolǵap sheberiniń judyryǵy myqty, talaby taýdaı, armany asqaq. Osydan on shaqty jyl buryn Dınanyń dál osyndaı bıikke qol jetkizetinine sengen bir adam bolsa, ol onyń anasy men jattyqtyrýshysy edi.
«Qolyma bylǵary qolǵap kıip, boksshy bolamyn, dep kelgen meniń talabymdy janyp, qabiletimdi ashyp, bolashaǵyma zor senim artqan jattyqtyrýshy Aleksandr Vysotskııge aıtar alǵysym sheksiz», - deıdi boksshy qyz.
Qyzdardyń aýyr atletıka, boks sııaqty úlken kúshti qajet etetin sport túrlerimen aınalysýy búginde eshkimniń tańdanysyn týdyrmaıdy. Sodan bolar, onyń bokspen aınalysqanyna týǵan-týystary da qarsy bola qoımaǵan.
«Bokspen 13 jasymnan beri aınalysyp kelemin. Sol jyldary Jaqsy aýdanyndaǵy «TNK agrofırmasynyń» qoldaýymen T.Ýálıev atyndaǵy sport mektebinde qyzdar boksynan úıirme ashyldy. Klastas qyzdarmen erip barǵan edim, basynda jaı qyzyǵýshylyǵym basym boldy. Keıin tylsym syrǵa toly ǵajaıyp sport álemi ózine baýraı tústi. Anam meniń bul tańdaýyma qarsylyq bildirgen joq. Kerisinshe, qoldaý kórsetti. Osylaısha, bylǵary qolǵapty myqtap qolyma kıdim»,- deıdi Dına Jolaman.
Sportshy óziniń álem chempıonyna deıingi joly birden jáne kezdeısoq samǵaý arqyly emes, satylap ósýmen jáne kóp ter tóge otyryp jattyǵýdyń arqasynda kelgenin aıtýda.
«Sportta «Jeńilis tapsań da, jeńisten úmit úzbeý kerek» degen qaǵıda bar. Rıngke alǵash ret 14 jasymda shyqtym. Alǵashqy ret shyǵyp, jeńilip qalǵanym ras. Biraq, óz isiniń sheberi jattyqtyrýshymnyń qoldaýymen men sporttan qol úzbeı, eńsemdi ezbeı kerisinshe, eki ese eńbektenip, jeńiske degen qulshynyspen alǵa umtyldym. Búgin sonyń nátıjesin kórip otyrmyn», dep sózin qorytyndylady keıipkerimiz.
Aıta ketý kerek, Dına Jolaman - 2016 jyly Astana qalasynda Rıo-de-Janeırodaǵy jazǵy Olımpıadaǵa joldama sarapqa salynǵan saıysta altyn medaldy jeńip aldy. 67 elden 285 boksshy qatysqan osy dúbirli dodada 54 keli salmaq dárejesinde saıysqa túsken aqmolalyq sportshy qarsylastarynyń bárin jeńip, álem chempıony atandy. Áıelder arasyndaǵy boks búginde olımpıadalyq oıyndar tizimine engen sporttyń eń tanymal túri bolyp sanalady.
Birneshe dúrkin respýblıka chempıony bolǵan Dına 2014 jyly Ońtústik Koreıada ótken halyqaralyq jarysta besinshi satydan kórinip, bolashaǵynan úlken úmit kúttiretin sportshy ekenin kórsetti. Mundaı dúbirli jarysqa alǵash qatysqan jas sportshy úshin bul az tabys emes. Sondaı-aq, bul jetistik oǵan halyqaralyq dárejedegi sport sheberi ataǵyn alýǵa yqpalyn tıgizdi.
Astanada ótken jarysqa qaıta oralsaq, bul - dál Olımpıada oıyndary qarsańynda ótken asa jaýapty da kúrdeli syn bolǵan edi. Jarys júldegeri Olımpıadaǵa joldama da alýy tıistin. Sondyqtan sportshylar jeńis úshin janyn salyp baqty. Dınanyń qarsylastary talaı jarystarda top jarǵan kileń myqtylar boldy. Degenmen, olardyń ataq-dańqy, burynǵy jeńisteri jas boksshynyń boıyna úreı uıalata qoıǵan joq. Nemis sportshysy Orneleı Vahnerdi 3:0 esebimen utqan ol qytaılyq Aııa Shınmatony da sondaı eseppen tize búktirdi. Fınalda taǵy bir qytaılyq Lıý Pıapıaony da 3:0 esebimen anyq basymdyqpen jeńdi. Sóıtip, elimiz tarıhynda áıelder arasynda ekinshi álem chempıony atandy.
Ókinishke oraı, Dına Rıo-de-Janeıroda ótetin Olımpıadaǵa bara almady. Óıtkeni, onyń salmaǵy Olımpıada oıyndaryna kiretin salmaq ólshemine enbedi. Olımpıadada áıelder boksynda úsh:- 51, 60 jáne 75 keli salmaqtary ǵana qarastyrylǵan. Degenmen, bul jasyndaı jarqyrap, bıikke umtylǵan talantty sportshynyń jolyna tosqaýyl bola almaıdy. Ony aldynda áli de talaı dúbirli jarystar kútip tur.
Eliniń abyroıyn oılaǵan, sol úshin ter tókken Qazaqstannyń 100 jańa esiminiń biri Dına Jolamandy áli talaı bıikten kóretinimiz anyq. Oǵan Dınanyń sporttyq əleýeti men múmkindigi jeterlik.
