Jeńilip kórmegen qazaqstandyq kásipqoı boksshy amerıkalyqpen kezdesý ótkizedi
ASTANA. QazAqparat - Jeńilip kórmegen qazaqstandyq Baqtııar Eıýbov (13-0, 11 KO) amerıkalyq boksshy Nıkolas Gıvhenmen (21-1-1, 11 KO) aıqas ótkizýge daıyndalyp jatyr, dep habarlaıdy «SPORTINFORM» SAA.
Amerıkalyq óziniń Feısbýktegi paraqshasynda jekpe-jektiń aldynda salmaq ólsheý rásimindegi sýretin jarııalap, «Bir ǵana korol bar» dep jazdy. Sondaı-aq, IBF óńirlik tıtýlynyń sýretin «Mynany alatyn ýaqyt keldi» degen jazbamen jarııalady.
Eıýbov - Gıvhen jekpe-jegi 22 maýsymda Detroıtta ótedi. Bul keshte ekinshi orta salmaqtaǵy IBF jáne WBC tujyrymy boıynsha álem chempıony amerıkalyq Klarıssa Shılds (5-0, 2 KO) pen kostarıkalyq Hanna Gabrıels (18-1-1, 11 KO) kezdesedi.
Eske salaıyq, Baha Pýlıa degen laqap atpen tanymal bolǵan Baqtııar Eıýbov (13-0, 11 KO) 2012 jyldyń aqpanynda kásibı rıngte sátti debıýt jasaǵan bolatyn. Munyń aldynda Klarıssa Shıldstiń anderkartynda ótýi tıis jekpe-jek qarsylasynyń qasynyń kesilip ketý saldarynan bolmaı qalǵan edi.
