Jeńilip kórmegen qazaqstandyq boksshy WBC tıtýlyna talasady

ASTANA. QazAqparat - Taraz boks mektebiniń jeńilip kórmegen túlegi Nursultan Jańabaev (5-0, 4 KO) 23 jeltoqsan kúni Máskeýdegi «Krylıa Sovetov» sport kesheninde ótetin kásipqoı boks keshinde birinshi orta salmaq sanatyndaǵy WBC Asia óńirlik tıtýly úshin rıngke shyǵady, dep habarlaıdy QazAqparat Sports.kz-ke silteme jasap.

Qazaqstandyq sportshynyń aıtýynsha, ol Búkilálemdik boks keńesiniń tıtýlyn fılıppındik asa tájirıbeli boksshy Arnel Tınampeımen (25-22-1, 11 KO) sarapqa salady. Aıta keteıik, bir kezderi Tınampeı Vıtalıı Demıanenkomen de rıngke shyǵyp, tóreshilerdiń sheshimimen jeńilgen bolatyn.

Eske salaıyq, osynyń aldynda Reseıdiń Vladımır qalasynda ótken jekpe-jeginde Nursultan Jańabaev tanzanııalyq 25 jastaǵy Kýlva Býshırıdi tehnıkalyq nokaýtpen jeńgen.