Jeńilip kórmegen boksshy Áshkeev kelesi aıqasy qashan ótetinin aıtty
ASTANA. QazAqparat - Jeńilip kórmegen qazaqstandyq kásipqoı boksshy Madııar Áshkeevtiń (8-0, 4 KO) kezekti aıqasy qashan ótetini belgili boldy, dep habarlaıdy QazAqparat.
Otandasymyz 9-shy aıqasyn kelesi jyly 3 naýryzda Nıý-Iork qalasyndaǵy Madison Square Garden arenasynda ótkizbek. Bul týraly boksshy Instagram jelisinde «Kópten kútken jańalyq ta keldi. Kelesi jekpe-jegim qashan ótenini belgili boldy. 3 naýryz. Nıý-Iork. Medıson Skver Gardende. Qazir sol jekpe-jekke daıyndyq qyzý ótip jatyr», - jazdy.
Bul kúni basty jekpe-jek reseılik Sergeı Kovalev pen otandasy Igor Mıhalkın arasynda ótedi. Al ázirge Áshkeevtiń kimmen judyryqtasatyny belgisiz.
