Jeńilip kórmegen amerıkalyqqa Golovkınmen kezdesý týraly keńes berildi
ASTANA. QazAqparat - USA Today Sports jýrnalısi Maık Koppındjer amerıkalyq boksshy Demetrıýs Andradeniń (24-0, 16 KO) úlken aıqasqa shyǵý kerektigin aıtty, dep jazdy Sports.kz .
Onyń yqtımal qarsylastarynyń biri retinde jýrnalıst qazaqstandyq Gennadıı Golovkındi (36-0, 33 KO) atady.
«Andradeniń ózi de biledi, 154 fýntpen rınge shyǵý uzaqqa sozylmaıdy. Kelesi jyly ol orta salmaqqa ótedi. Onyń jasy 29-da, alaıda bul boks juldyzy atanyp, úzdik P4P-boksshylar tizimine enýge kedergi keltirmeıdi. Bul úshin ol ótken kezdesý sekildi Germanııada emes, mıllıondaǵan aqsha úshin AQSh-ta Golovkın, Kanelo sekildi úzdik P4P-boksshylarmen kezdesý ótkizýi tıis», - dep jazdy avtor.
Buǵan deıin Andradeniń ózi de 160 fýntqa ótip, Golovkınmen qolǵap túıistirgisi keletinin málim etken edi.
