Jeńildikti qarjylandyrý monoqalalarda turaqty eńbek naryǵyn qurýǵa serpin beredi - Qaısar Nyǵmetov
NUR-SULTAN. QazAqparat – Jeńildikti qarjylandyrý monoqalalarda qyzmet kórsetý salasyn damytýǵa ári turaqty eńbek naryǵyn qurýǵa serpin beredi. Bul týraly «Ekonomıkalyq zertteýler ınstıtýty» AQ Óńirlik zertteýler ortalyǵynyń dırektory Qaısar Nyǵmetov aıtty, dep habarlaıdy QazAqparat tilshisi.
«Memleket basshysy Qasym-Jomart Toqaev Ekibastuzdaǵy monoqalalardy damytý máseleleri jónindegi keńeste Kásipkerlikti damytý jónindegi ulttyq joba aıasynda monoqalalardaǵy shaǵyn jáne orta bıznesti 5%-dyq jeńildikpen qarjylandyrýdyń jeke baǵytyn qarastyrýdy tapsyrdy. Monoqalalar úshin jeńildikti mıkrokredıt berý úshin salany keńeıtý nege sonshalyqty mańyzdy? Monoqalalarda qala quraýshy kásiporyndardyń aınalasynda shaǵyn jáne orta kásipkerlik sýbektileriniń turaqty jelisi paıda bolýy tıis. Bul monoqalalardyń ekonomıkasyn birtindep ártaraptandyrýǵa múmkindik beredi. Shaǵyn jáne orta kásipkerlikti damytý qala quraýshy kásiporyndar óz rólin joǵaltatyn, ınvestıtsııa men ónerkásiptik óndiris kólemi tómendeıtin damý áleýeti tómen monoqalalar úshin erekshe mańyzǵa ıe», - dedi Q. Nyǵmetov «QazAqparatqa» bergen suhbatynda
Onyń aıtýynsha, monoqalalarda jeńildikti qarjylandyrýǵa qoljetimdilikti keńeıtý qyzmet kórsetý salasyn damytýǵa jáne neǵurlym turaqty eńbek naryǵyn qurýǵa serpin beredi. Óńirlik naryq aýqymynda jáne elde jańa naryqtardyń ashylýyna, sondaı-aq monoqalalardyń iri qalalar men oblys ortalyqtary syndy «ósý núktelerimen» kólik baılanysyn qamtamasyz etýge yqpal etedi.
Eske sala keteıik, jaqynda Memleket basshysy Qasym-Jomart Toqaev monoqalalardy damytý máseleleri jónindegi keńes ótkizgen bolatyn.
