Jeńildikter eskerilgen azamattar Astananyń mańyndaǵy aımaqtarda avtobýstarda tegin júre alady
ASTANA. QazAqparat - Jeńildikter eskerilgen azamattardyń sanaty úshin Astananyń qala mańy aımaqtarynda avtobýstarda tegin júrý quqyǵyna ıe boldy. Bul týraly búgin Astanada ótken baspasóz máslıhatynda málim boldy.
Atalǵan jańashyldyqtarǵa «ASTRA PLAT» jol aqysyn tóleýdiń elektrondy júıesiniń birinshi daıyndyq kezeńiniń engizilýi arqasynda qol jetkizildi.
«Aǵymdaǵy jyldyń 30 shildesinen bastap qala mańy baǵdarlarynda tarıftik 4 aımaq júıesi engizildi. Bul «ASTRA PLAT» elektrondy júıesin engizý daıyndyq kezeńiniń bastapqy satysy bolyp tabylady. Osy rette qala mańyndaǵy avtobýs baǵdarlarymen júretin jolaýshylar úshin jol aqysy ortasha eseppen alǵanda 50 teńgege deıin tómendeıdi»,-dedi «Astana-LRT» JShS-nyń jolaýshylar kóligi mamany Á. Tamabaev.
Belgili bolǵandaı, bólingen 4 tarıftik aımaqtyń árqaısysynyń qashyqtyǵy 15 shaqyrym. Búginde qala mańyndaǵy tasymal 24 eldi mekendi qamtyp otyr jáne olarǵa 14 baǵdar qyzmet etedi.
Onyń aıtýynsha, árbir eldi mekenniń óziniń tarıfi bolatyn, sondaı-aq bul tarıfterdiń sany 84-ke jetken edi. Al qazirgi kezde olardyń barlyǵy yqshamdalyp, tarıfter 5-ke deıin qysqardy. Qala mańyndaǵy baǵdarlarǵa kúnine 39 avtobýs shyǵady. Árbir avtobýstar men olar toqtaıtyn aıaldamalarda tıisti túsindirý málimetteri ilingen.
«ASTRA PLAT» elektrondy júıesiniń ekinshi, úshinshi jáne tórtinshi kezeńderi engiziletin bolady. Ekinshi kezeń qalalyq «eksperss baǵdarlaryna» taralatyn bolady», - dedi Á. Tamabaev.
Astana qalasy máslıhatynyń sheshimimen jeńildigi bar sanattar boıynsha UOS ardagerleri men olarǵa teńestirilgen azamattar, zeınetkerler, múmkindigi shekteýli jandar, kóp balaly analar qamtylǵan. Dál osy sanattar boıynsha jeńildikter qala mańyndaǵy turǵyndarǵa da taraıdy.
