Jeńildikpen úı alyp beremin: Shymkenttik 35 adamdy aldap ketti
ShYMKENT. QazAqparat - Shymkentte jeńildikpen úı alyp beremin degen alaıaq áıel 35 adamdy aldap ketken. Kúdikti jábirlenýshilerge mıllıon teńgeden astam shyǵyn keltirdi, dep habarlaıdy QazAqparat tilshisi.
Ál-Farabı aýdanyndaǵy polıtsııa bólimine alaıaqtyń qurbany bolǵan on shaqty turǵyny aryzdanǵan.
Olardyń sózine qaraǵanda, alaıaq áıel olardy memlekettik baǵdarlamamen úı jáne aqsha alyp beremin dep, aqshalaryn alyp ketipti. Osydan keıin tártip saqshylary birneshe alaıaqtyq oqıǵasyna qatysy bar degen kúdikpen 40 jastaǵy áıeldi ustady. Tergeý barysynda seziktiniń azamattardyń senimine kirip, «Órleý» baǵdarlamasy boıynsha aqsha jáne úı alyp berýge kómektesemin dep aldaǵany anyqtaldy.
Polıtseıler tergeý barysynda kúdiktiniń 35 oqıǵaǵa qatysy baryn anyqtady.
Dál osyndaı alaıaqtyq qylmysy shahardyń Qarataý, Eńbekshi aýdandarynda da tirkeldi. Eńbekshi polıtsııa bóliminiń qyzmetkerleri 25 alaıaqtyq iske qatysy bar degen 28 jastaǵy seziktini ustady. Tergeý barysynda onyń qala turǵyndaryna memlekettik baǵdarlamamen aqsha alýǵa kómektesetinin aıtyp, ár jábirlenýshiden 50 myń teńgesin alyp otyrǵany anyqtaldy. Jábirlenýshilerge keltirilgen jalpy shyǵyn kólemi mıllıon teńgeden asady. Al, Qarataý aýdanynyń polıtseıleri osy tektes qylmystarmen Shymkent qalasynyń 1987 j.t turǵynyn ustady. Ol oblys ortalyǵynyń úsh turǵynyn aldap, jábirlenýshilerge shamamen mıllıon teńge shyǵyn keltirgen.
Qazirgi tańda barlyq alaıaqtyq oqıǵalar boıynsha Qylmystyq kodekstiń 190-babymen («Alaıaqtyq») is qozǵalyp, sotqa deıingi tergeý amaldary júrgizilýde.
