Jeńildetilgen shaǵyn nesıe dep eldi aldaǵan alaıaq ustaldy
ALMATY. QazAqparat - Almatyda onlaın mıkronesıe alyp beremin dep klıentterdiń kartasyndaǵy aqshany jymqyrǵan adam ustaldy, dep habarlaıdy QazAqparat tilshisi.
24 jastaǵy jigit jarnama saıtynda qarjylyq qyzmetterge, atap aıtqanda jeńildetilgen sharttarmen mıkronesıe berý týraly habarlandyrý jarııalady.
Jurtshylyqty tómen paıyz ben jeńil sharttary qyzyqtyrǵan.
«Tek 2015 jyldan beri ol tórt ret alaıaqtyq áreketi úshin jáne bir ret qaraqshylyq úshin jaýapqa tartyldy. Adamdar onyń jarnamasyna senip, onymen habarlasqannan keıin ol kelisimshart jasaǵany úshin tólem retinde jalpy somanyń 10 paıyzyn talap etti. Budan ári, mıkronesıe boıynsha aqsha aýdarý úshin «klıent» jeke málimetterin: jeke kýáligin jáne banktik kartanyń fotosyn eki jaǵynan usynýy kerek bolǵan. Bank kartochkalarynyń nómirin jáne kartanyń artqy jaǵynda kórsetilgen CVV kodyn bile otyryp, «qaryz alýshy» býkmekerlik keńselerdiń ınternet-termınaldary arqyly aqsha aýdarady. Ol eshkimge qarjylyq qyzmet kórsetpeıtini anyq. Qazir oǵan qatysty alaıaqtyqqa qatysty sotqa deıingi tergeý júrgizilip jatyr. Qanshalyqty ashyq bolsa da adamdar kıberqylmyskerlerdiń qurbany bolmas úshin jeke derekterdi, sondaı-aq banktik karta derekterin úshinshi adamǵa bermeý kerektigin umytpaýy kerek», – dedi Almaty qalalyq PD krımınaldyq Polıtsııa basqarmasynyń basshysy Erkin Іńkárov.
