Jeńildetilgen nesıemen kólik berýge qosymsha qarajat bóline me

NUR-SULTAN. QazAqparat – QR Indýstrııa jáne ınfraqurylymdyq damý mınıstri Qaıyrbek Óskenbaev kólik alýǵa jeńildetilgen paıyzy tómen nesıeni berý baǵdarlamasyna qosymsha qarajat bólý máselesi pysyqtalatynyn aıtty, dep habarlaıdy QazAqparat tilshisi.

Senatta tilshiler mınıstrden elimizde kólik alýǵa jeńildetilgen paıyzy tómen nesıeni berý baǵdarlamasyn iske asyrý barysy týraly surady. «Baǵdarlama aıasynda nesıe berý toqtap qaldy degen aqparat tarap jatyr, bul shyndyqqa janasa ma?» - degen saýal qoıyldy.

Óz kezeginde Q. Óskenbaev atalǵan baǵdarlama aıasynda 100 mlrd teńge bólingenin eske saldy.

«Kólik alýǵa qatysty adamdardan 20 myńnan astam ótinish kelip tústi. Qazirgi kezde 10 myńǵa jýyq ótinimdi bankter maquldady. Osy baǵytta 3 myńǵa tarta kólik ıelerine tapsyryldy», - dedi mınıstr.

Sonymen qatar vedomstvo basshysy atalǵan baǵdarlama aıasyndaǵy jumystar bir jylmen shektelmeıtinin atap ótti. Osy baǵdarlamany júzege asyrý aıasynda qarajat revolverlik tetik arqyly bólindi. Eger azamattarymyz birinshi kezekte satylymǵa shyǵarylǵan avtomobıldi alyp úlgermese, onda olar jeke adamdardan qarajat túskennen keıin, qaıtadan kólik alýǵa júgine alady.

«Baǵdarlama aıasynda suranys joǵary ekenin kórip otyrmyz. 100 mlrd teńgege nesıege 15-16 myń avtokólik alýǵa bolady. Qazirgi kezde bankter 73 mlrd teńge somasyn maquldap úlgerdi, 27 mlrd teńgesi qaldy. Baǵdarlamaǵa nesıe bólýge qatysty máseleni olarmen talqylaıtyn bolamyz», - dedi Q. Óskenbaev.

Budan buryn habarlanǵandaı, 3 maýsym kúni «Ónerkásipti damytý qory» AQ Qazaqstanda kólik alýǵa jeńildikpen paıyzy tómen nesıe berý baǵdarlamasy boıynsha jumysty jandandyrýǵa qatysty túsinik berdi.