Jeńildetilgen nesıemen 1 myńnan astam avtokólik satyldy

ALMATY. QazAqparat - 16 mamyrda Qazaqstanda avtokólikke jeńildetilgen nesıe baǵdarlamasy engizildi. Tómen paıyzben kólik alǵysy keletinder sany kún sanap artyp keledi. Alǵashqy kúnderi iri qalalardaǵy avtosalondarda uzyn-sonar kezek paıda boldy. Qazir jaǵdaı turaqtaldy. Qazaqstan avtobıznes qaýymdastyǵynyń dereginshe, búginde 1 myńnan astam kólik satyldy, dep habarlaıdy QazAqparat tilshisi.

«Baǵdarlama júzege asyp jatyr. Alǵashqy kúnderdegideı qalyń kezek búginde baıqalmaıdy. 31 mamyr tańerteńgi jaǵdaı boıynsha 23 719 ótinish túsip, onyń 9 918-i maquldandy. Bul - 73,3 mlrd teńge. Barlyǵy 1 188 avtokólik berildi», - deıdi Qazaqstan avtobıznes qaýymdastyǵynyń ókili Qaırat Elamanov.

Aıtýynsha, halyq arasynda berilis qoraby avtomatty túrdegi bıýdjettik kólikter joǵary suranysqa ıe.

«Kólik qunyna keletin bolsaq, baǵdarlama onyń baǵasyna áser etken joq. Biraq, ótken jylmen salystyrǵanda bıyl keıbir úlgilerge túzetýler engizilgenin eskertemin. Bul álemdegi geosaıası jaǵdaıǵa, teńge baǵamynyń aýytqýyna, logıstıkalyq qyzmetterdiń qymbattaýyna, sondaı-aq birqatar ekonomıkalyq sebepterge baılanysty», - dep túsindirdi spıker.

Sonymen qatar, ol búginde dılerlik ortalyqtarda kólik tapshylyǵy joq ekenin tilge tıek etti.

Almatydaǵy avtosalondardyń biriniń damý jónindegi dırektory Aleksandr Abramovtyń aıtýynsha, jeńildetilgen nesıe baǵdarlamasyna bastapqyda tanymal koreı kóliginiń birneshe úlgisi engizilgen.

«Búgingi tańda jeńildetilgen baǵdarlama boıynsha tóleýge 2 myńǵa jýyq shot-faktýra shyǵaryldy, onyń ishinde 300-den astam avtokólik rásimdeý satysynda. Qazirdiń ózinde Qazaqstan boıynsha 130-ǵa jýyq kólik satyldy. Klıentter negizinen Nur-Sultan, Almaty jáne Shymkent qalalarynan», - dedi ol.

Sonymen qatar, spıker avtokólik satatyn ortalyqtarda qosymsha jabdyq alýǵa májbúrleý zańsyz jáne oǵan tyıym salynǵanyn basa aıtty.

«Eger klıent osyndaı jaǵdaıǵa tap bolsa, onda ol 7007 nómiri boıynsha avtoortalyq qoldaý qyzmetine habarlasa alady», - dedi Aleksandr Abramov.

Eske salaıyq, Qazaqstanda avtokólikke jeńildetilgen nesıe berý 16 mamyrda bastaldy.

Baǵdarlamanyń negizgi sharttary mynadaı:

- Bir jeńil avtokólikti qarjylandyrý somasy 10 mln teńgeden aspaıdy;

- Bir zaemshi eki jyldyń ishinde bir ret qana avtokólikti jeńildetilgen nesıemen ala alady;

- qarjylandyrý merzimi 7 jyldan aspaıdy;

- bastapqy jarnasy - 0%;

- kólik quralynyń quny 15 mln teńgeden aspaýy qajet.