Jeńildetilgen nesıege kólik satyp alý baǵdarlamasy ázirlenip jatyr – QR IIDM

NUR-SULTAN. QazAqparat – Indýstrııa jáne ınfraqurylymdyq damý mınıstrligi Ekologııa, geologııa jáne tabıǵı resýrstar mınıstrligimen birlese otyryp, «Jasyl Damý» AQ qarajaty esebinen Qazaqstan Respýblıkasy azamattarynyń jeńildetilgen nesıege jeńil avtokólikter satyp alýy, sondaı-aq avtobýstar parkin jańartý baǵdarlamasyn ázirleýde.

Jeńildetilgen nesıelendirý baǵdarlamasy boıynsha qarjylandyrýdyń jalpy somasy shamamen 100 mlrd teńgeni quraıdy jáne Qazaqstan aımaqtarynda avtobýstardy jańartýǵa shamamen 30 mlrd teńge jumsalmaq, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.

«Otandyq óndirilgen tehnıkany satyp alý sharttary, sondaı-aq qarjylandyrý tártibi memlekettik organdarda kelisý rásimderinen ótý satysynda. Sáýir aıynyń sońyna deıin barlyq rásimderdi aıaqtaý josparlanýda. Máselen, halyq úshin satyp alý sharttary 0%-dan bastap bastapqy jarna, nesıe merzimi 7 jylǵa deıin, satyp alýshy úshin 1 birlik avtokólik úshin nesıeniń maksımaldy somasy 10 000 000 teńgeden aspaıdy»,-delingen habarlamada.