Jeńildetilgen nesıe óz kásibimdi keńeıtýge múmkindik berdi - kásipker

TÚRKІSTAN OBLYSY. QazAqparat – Jeńildetilgen nesıe aýyldaǵy kásipkerlerge múmkindik ashty. Bul týraly Shardara aýdanyndaǵy «Azamat» sharýa qojalyǵynyń basshysy Aıbas Dosymbaev aıtty, dep habarlaıdy QazAqparat.

«Aýyl sharýashylyǵy salasynda túrli reformalar qolǵa alynyp, sonyń nátıjesinde búginde jeke kásipkerlik jolǵa qoıyldy. Biz de qarap júrmeı ózimizge tıesili on gektar jerdi ıgerý úshin «Azamat» sharýa qojalyǵyn quryp, jumys bastadyq. Alǵashqy jyldary egin egý úshin maqta zaýyttarynan nesıe alýǵa májbúr boldyq. Olardyń qaıtarymy qıyǵa soqty. «Sybaǵa» baǵdarlamasy qabyldanyp, 2013 jyly 8,5 mıllıon nesıe aldyq. Tehnıkalarymyzdy jańalap, egin, mal sharýashylyǵyn qatar alyp júrýge qol jetkizdik», - deıdi Aıbas Dosymbaev.

Sharýa qojalyǵy ótken jyly tabysty jumys istegen.

«Ótken jyly qaryzdan tolyq qutylyp, jeńildetilgen jolmen, ıaǵnı, lızıngpen traktor aldyq. Búginde eki júk kóligi, bir traktorymyz bar. Egistik alqapqa maqta, jem-shóp egemiz. Mal azyǵyn ózimiz daıyndaımyz. Munyń bári biz sııaqty sharýasharǵa berilgen kómektiń nátıjesi. Bir sózben, aıtqanda, jeńildetilgen jol bızneske jol ashty», - deıdi kásipker.